Zangnadawmna la tawh, in ṭhiat lote chungah zahngaihna lantir dawn lo

Lunglei district Competent Authority for Land Acquisition (CALA) Ramdinliani, bawrhsap hoin nimin khan DC conference hall-ah Lunglei district-a NH-54 kawngpuiin a paltlang khuaa village council hruaitute leh NHIDCL aiawhte an ṭhukhawm. DC chuan, zangnadawmna la tawh leh an in ṭhiat tura hriattirna dawng tawh zinga in la ṭhiat lote lakah zahngaihna an lantir tawh dawn lo tih a sawi.

Ramdinliani chuan, NH-54 laih hna thawktu NHIDCL hotute chu sorkar laipuiin March 2024 chhunga zo vek turin thu a pe tih sawiin, "Zangnadawmna la vek tawh leh an in ṭhiat tura hriattirna dawng tawh zinga la thiat duh lote chungah District Administration-in zahngaihna leh hriatthiamna an nei tawh dawn lo. Court-in stay order a chhuah loh chuan kan hmalakna tur hi court-in a dâl dawn lo a, arbitrator chuan compensation amount-ah inrawlh theihna a nei a, in ṭhiah leh ṭhiah loh turah a inrawlh dawn lo," a ti.

VC-te chu an huam chhung ṭheuha in ṭhiah turte chu CALA-in dan anga a ṭhiah a, thubuai a awrh kher loh nan in neitute hriattir turin a chah a; zangnadawmna chungchangah thil tihfel tur awm ang angte chu tihfel thuai a, NHIDCL pawh an hnathawhah harsatna tâwk loa March thla ral hma ngeia an zawh a ṭul thu a sawi.

Lunglei DC chuan, a mal mala zangnadawmna dil leh re-estimate dilna thehluh chu NHIDCL-in a lo hnâwl ṭhin tih sawiin, "Zangadawmna kaihhnawih thil rêng rêng a hlawmin NHIDCL kan thawn dawn a, tun bak hi chance a awm tawh dawn lo. Compensation channel pangngaia a kal chuan kan tlai tawh dawn avangin NHIDCL-te'n zangnadawmna aiah direct purchase-a kalpui an remti tawh a, hemi atana bawhzui ngai thilte chu a kaihhnawih department, NHIDCL leh zangnadawmna diltute nen inberâwn zelin, rang takin bawhzui a ni ang," a ti.

Ṭhutkhawma tarlan danin, PHE department-in Jal Jeevan Mission (JJM) hnuaiah Lunglei district thingtlang khuaa in tina tui connection pek vek tura an hmalaknaah 99% an zo tawh a, a bak 1% chu NH-54 laih mek vangin hna an chhunzawm thei rih lo.

NHIDCL aiawh leh khaw tin VC hruaitute chuan anmahni khua ṭheuha zangnadawmna dawng tawh te, la dawng lo te, chhût ṭhat dil te, a thara dil te, harsatna an tawhte leh thil dangte an tarlang a; an harsatna tawhte sukiang tura DC hmalak tum dan chu lawmawm an tih thu an sawi.