Cancer vei phaia thawn zingah zûk leh hmuam vanga cancer vei 85% an awm

Nimin khan CHANEM conference hall-ah kohhran hruaitute pualin zûk leh hmûam chungchang inzirtirna buatsaih a ni a, state nodal officer Dr H Lianthangpuia'n a hmanpui. Mizoram mi cancer vei phaia thawn zingah zûk leh hmuam vanga cancer vei 85% an awm thu tarlan a ni.

Zirhonaa tarlan danin, Mizo damlo phaia thawn (refer) zinga 92.23% chu zûk leh hmuam ti an ni a, 57.53% chu zûk leh hmuam kaihhnawih natna vanga thawn an ni. State pawna thawn zinga 34.32% chu cancer vei an ni a, cancer vei zinga 85% chu zûk leh hmuam vang a ni. Cancer damlo state páwna thawn zinga 75% chu zûk leh hmuam ti lo mahse an chhungte tih vanga vei an ni.

Gutkha lam ei nasa zingah ká (mouth) chhung cancer leh natna dang vei an tam tawh hle a, tuibûrin chaw dáwt cancer a thlen theih thu leh gutkha aiin a lêt 20 vela a hlauhawm zawk thu tarlan a ni bawk.

Dr H Lianthangpuia chuan, zûk leh hmuamin mihring nunah pawi thui tak a khawih theih thu a sawi a, "Ṭhangthar te'n zûk leh hmuam an rawn tih loh chuan kan ramin hriselna kawngah nasa takin hma a sawn dawn. Zirnaah pawh zûk leh hmuam ṭhat lohna inzirtir uar a ṭul a, zirna sang lam aiin a hniam lamah ngaih pawimawh zual ni se duhthusam a ni," a ti.

Champhai chief medical officer Dr PC Lalhmingthanga chuan, kohhran hruaitute chu zûk leh hmuam ṭhat lohna inzirtirnaa ṭan lâkpuiah sáwmin, thu an sawinaah a remchang a nih chuan sawi tel ṭhin turin a ngen a, "Kohhran aṭanga ṭan lak a nih loh chuan zûk leh hmuam donaah hma kan sawn thei dawn lo," a ti.

National Tobacco Control Programme state consultant R Lalremruata'n zûk leh hmuam ṭhat lohna leh mihring taksaa nghawng ṭha a neih dan a tarlang bawk.