NH kawng siam zawh hun turah YMA-in contractor hriattirna an pe

YMA Sub-Headquarters, Kolasib chuan January 17, Nilaini khan National Highway 306-a Seṭhawn leh Kawnpui quarry bul inkar siamtu NHIDCL contractor John Hlychho hnenah lehkha an thawn a, March 2024 chhungin kawng siam hna ṭha taka zo turin an hriattir.

Kolasib YMA chuan, Seṭhawn leh Kawnpui quarry inkar kawng siam hna chu a chak lo hle tih tarlangin, "Chhuanlam hrang hrang siamin hnathawh tikhawmuang luihah kan ngai. Blacktop-a siam a nih chuan hun rei lo têah a chhiat leh mai dawn avangin PCC-a siam ngei turin contractor kan phût a ni," an ti.

Kawng siam hna ṭha taka thawk tur leh March 2024 ral hma ngeia thawk zo turin contractor chu Kolasib YMA chuan hriattirin, "Hemi hun chhunga thawh zawh a nih loh chuan kan remhriat danin hma kan la ang tih kan inhriattir a ni," an ti a; hnathawh dan an en zui zel tur thu an tarlang.