Chief Minister adviser-te'n hna an thawk tak tak dawn - ZPM Ṭhalai

ZPM Ṭhalai chuan thuchhuah siamin, Adviser to Chief Minister panga an awm chu lawmawm an tih thu leh, adviser-te chuan hna an thawh tak tak dawn thu an tarlang.

ZPM ṭhalaite chuan, CM Lalduhoma'n CM adviser hna thawk turin Dr KC Lalmalsawmzauva (i/c Handholding Policy), TBC Lalvenchhunga (i/c Finance), Dr Lorraine Lalpekliana Chinzah (i/c Health), Ginzalal (i/c Technical) leh Lalmuanpuia Punte (i/c Political) a nei chu lawmawm an tih thu an tarlang a, "Mizoram sorkar tan an thiamna leh theihnate hmangin hna ropui tak an thawh ngei kan ring," an ti.

"Dan palzûtna hnuaia hamṭhatna lo dawngtute sawiselna karah Mizoram sorkar chu huai taka kal turin dusakna kan hlan a ni," tiin ZPM Ṭhalai chuan, ZPM kaihhruai Mizoram sorkarin thla khat vel chauh hna a thawh chhungin sorkar liam taa mipuiin siamṭhat an duh tak takte siamṭhat leh thlak danglam a ni mek niin an sawi.

ZPM ṭhalaite chuan, sorkar hnathawk zinga a tam ber chu thil ṭha duh, rinawm tak leh ṭhahnemngai taka thawk ṭhin an ni tih sawiin, "Hei hi Mizoram kan vanneihna a ni. Thil ṭha duhtu sorkar hnathawkte ZPM ṭhalai chuan kan chhuang a, duhsakna kan hlan a ni," an ti.