Kawngpui zauhin a tihchhiatte siamṭha turin contractor hriattir

Hnahthial district bawrhsap Chuauhnuna chuan nimin khan a pisaah Hnahthial district-a National Highway-54 zauh leh thawm ṭhat hna thawk mektu contractor-te a kâwm a; NH-54 kawngpui siamin a tihchhiatte siamṭhat hna April 15, 2024 hmaa zo turin a hriattir.

Inkhawmhonaah hian Ministry of Road Transport & Highways hnuaia NH-54 kawngpui laih zauh leh thawm ṭhat hna thawh mekin mipui vantlang thil hrang hrang a tihchhiat chungchang sawiho a ni. DC chuan, mipui vantlangin an hman kalkawng te, step leh khaw chhung kawng tihchhiat palh awmte endik thuai tur te, a hma thei ang bera an zirchianna thehlut tur leh, kawngpuiin a khawih chhiatte April 15, 2024 hmaa siamṭha vek turin contractor-te a hriattir a ni.

NH-54 kawnga ram neitu, zangnadawmna la tawh, an ram la chhuahsan lote leh sorkar ram lak chhunga in sa thar leh te, District Administration aṭanga ram chhuahsan tawh tura hriattirna lehkha dawng tawh zinga la chhuahsan lote chungchangah contractor-te chu in ṭhiahsakna tur hmanraw mamawhte sorkar ngaituahpui turin a chah bawk.

Ṭhutkhawmah hian Hnahthial Additional DC, SDO (Sadar), BDO leh SDC te, NHIDCL Lunglei General Manager, ACBI aiawh, BIPL Rawpui camp aiawhte leh Mathiyan Construction aiawhte an tel a ni.