Lunglei khawpuia ran khuahkhirh dan tur LMC leh YMA-in an sawiho

Lunglei Municipal Council (LMC) vice chairman K Lalrinawma chu nimin khan a pisaah YMA Sub-Headquarters, Lunglei hruaitute nen an inkâwm a, LMC huam chhunga lirthei hûnna (parking) chungchang leh ran khuahkhirh chungchang an sawiho.

Ṭhukhawmah hian LMC huam chhunga lirthei hûn lailâwkna (parking) mumal lo, lirthei che vel mumal lo leh ṭha zawka lirthei chet vel dan ruahman dan turte sawiho a ni a; ran vulh chungchangah inkaihhruaina mumal zawk siam dan tur te, a ṭul ang zela LMC leh Sub-Hqrs YMA thawhho dan turte sawiho a ni bawk.

Sub-Hqrs YMA president Lalfakzuala chuan, hun rei tak aṭanga an beisei, mahnia ro inrelna Lungleiin a nei leh thil siamṭhat duh tak takte councillor atana thlan an ni chu lawmawm a tih thu a sawi a; Lunglei chu khawpui nuam leh inenkawlna ṭha tak a nih theih nan YMA-in LMC thawhpui zel an tum thu LMC Vice Chairman a hrilh.

Ṭhutkhawmah hian LMC executive councillor pahnih Zorinsanga Hmar leh Lalhruaitluangi Sailo te pawh an tel a, YMA Sub-Hqrs, Lunglei office bearer-te an tel kim a ni.