Sorkar sum tihchingpen thubuaiah LADC CEM thiam loh chantir a ni

Aizawl District Court-a special judge (Prevention of Corruption Act) Dr HTC Lalrinchhana chuan sorkar sum tihchingpen thubuaiah Lai Autonomous District Council (LADC) chief executive member (CEM) V Zirsanga chu thiam loh a chantir a, mi dang pathum pawh thiam loh a chantir bawk. Anmahni hrem dan tur chu January 22, 2024-ah puan a ni ang.

V Zirsanga hi sum tihchingpen a nih laiin LADC executive member i/c Education (Middle School) a ni a; thiam loh chantir dangte chu sum tihchingpen a nih laia Lawngtlai district Education officer Lalduna Chinzah, Lawngtlai Sub-Hqrs. Middle School Teachers Association president NC Muankima leh secretary C Lalchawiliana te an ni.

Court thutluknaa tarlan danin, V Zirsanga leh mi dangte hi inthurualin Mizoram sorkar sum cheng nuai 133.56 (Rs 1,33,56,884) an khawih chingpen a; V Zirsanga te hian zirtirtu leh thawktu dang mi 41-te kum 2013 April leh May thla hlawh chu LADC hian a lo pe tawh anga an sawi chu dâwt a ni tih finfiah a ni.

An sum khawih chingpen aṭang hian V Zirsanga hian Rs 21,00,000 a chang a, pawisa hi a chhuitu ACB-te'n hian an man lêt leh a ni.

Lalduna Chinzah chuan Rs 73,37,220 a eiru a, NC Muan­kima'n Lalduna Chinzah hnen aṭangin Rs 50,00,000 a la a, Rs 50,00,000 aṭangin Lalchawi­liana nen Rs 29,00,000 an khawih chingpen leh bawk.

Thubuaiah hian NC Muankima chu a meizang hlaptu ber (main accuse) a ni a, zirtirtu leh thawktu dangte service book lem siamnaa a inhnamhnawih bakah, vantlang hnena hna zawrhna (open advertisement) awm lo leh interview pangngai awm loin sorkar hmalakna turah MSTA, Lawngtlai pisa aṭangin thuneihna nei si loin an duhsak zawngte zirtirtu leh thawktu dang atan an lo la a ni.

C Lalchawiliana hian a hun laia MSTA, Lawngtlai secretary a nih angin an president NC Muankima nen Lawngtlai DEO pisa aṭangin Rs 50,00,000 an la chhuak a, V Zirsanga chu Rs 21,00,000 an pe dun. Rs 50,00,000 an lak chhuah aṭangin C Lalchawiliana leh NC Muankima te hian Rs 29,00,000 an khawih chingpen a, an kut aṭangin ACB-te'n Rs 7,93,750 an man lêt a ni.

He thubuaia ACB-te'n sum an hmuh lêt chu Rs 28,93,750 a ni a, sorkar sum báwma chhûn luh turin Special Court chuan thutlukna a siam.