NIT hmun thara hnathawh tawh chin HTE Minister-in lungawithlak loh a ti

Higher & Technical Education (HTE) minister Dr Vanlalthlana chuan nimin khan Lengpui rama National Institute of Technology (NIT), Mizoram hmun a tlawh a; hmunhma buatsaihnaah tun thlenga hmalak tawh chin chu lungawithlâk loh a tih thu leh sum sèn ral tawh leh hmalakna inmil lo chu a vei thu a sawi.

NIT, campus Lengpui a tlawhnaah Dr Vanlalthlana hian hmalakna leh hmachhawpte a en a; NIT dangte ang bawkin changtlung taka NIT Mizoram kalpui chu sorkar leh mipui duh dan a nih thu sawiin, "Ram tana ro hlu ni tura ngaih NIT campus buatsaihah tun thlenga hmalak tawh chin hi a lungawithlak loh a, sum sên ral tawh leh hmalakna inmil lo hi a veiawm," a ti.

HTE Minister chuan, NIT chu Mizoram mai ni lo, India ram tana zirna-in pawimawh leh ṭhalaite tana thiam thil zirnaa hmun pawimawh a nih avangin tihmasawn turin theihtawp chhuaha ṭan lak tlân a ngaih thu a sawi a; zau zawka inràwnkhawmna neih hnuah a ṭul angte sorkar laipuia thlen thuai a tum thu a sawi bawk.

NIT, Mizoram registrar Prof. Ajmal Koya leh thawktu dangte'n Minister hi an lo dawngsawng a; contractor IRCON kaltlangin a hungna, PCC flooring, campus chhung inkalpawhna, electric pawh luhna leh a hmun siam rem (leveling) thawh a nih thu leh hmalakna dangte an lo hrilhfiah.

Sorkar thuchhuah tarlan danin, hmalaknate enfiahna aṭangin sum sên ral tawh zat ngaihtuahin tuna thlen chin, hna an thawh tawh chin chu a bei tham hlea hriat a ni a; NIT hotute chu campus chhunga hmalakna leh hmanrua reng reng neitu thinlung pu chunga enkawl tura hriattir an ni.

NIT hmunah hian NIT, Mizoramin a nihna ang tur tak a thlen theih nana hmalak leh bawhzui ṭul te, riverine forest reserve huam chhunga awm a nih avanga dan anga chak zawka hmalak ṭul dante an sawiho.

HTE Minister hi HTE secretary Esther Lalruatkimi, director Sangchhin Chinzah, Mamit district forest officer C Lalrinmuana leh a kaihhnawih department hotute'n an ṭawiawm a ni.