Mizoram páwn aṭanga rawn lutte'n ram an lei sorkarin a ngai thutak

Land Revenue & Settle­ment (LRS) department chuan tun hnai khan hriattirna tichhuakin, sorkarin Mizoram pawn aṭanga rawn lutte'n Mizorama ram an lei chu a ngai thutak tih a tarlang.

LRS department chuan, tunlai hian chhan hrang hrang vangin state dang leh ram dang aṭanga Mizoram rawn lutte'n ram an lei nasat thu a thang nasa hle tih an tarlang a, "Hemi chungchang hi sorkar chuan a ngai thutak hle. The Mizoram (Land Revenue) Act, 2013-in a sawi angin ram neih chungchang leh ram hralh leh lei chungchangah mipui kan fimkhur a ngai," an ti.

Mizoram chhunga ram nei theite LRS department-in a tarlan chu, Mizorama chêng nghet, an chhungte January 26, 1950 hma lama Mizorama chêng tawh emaw, India ram President-in Constitution Article 342(1) hnuaia Mizoram state tan bik scheduled tribe-a a puante an ni.