March 15 aia tlai loah lo hâl tur

Environment, Forest & Climate Change (EFCC) minister Lalthansanga kaihhruaiin nimin khan SAD conference hall-ah State Level Sub-Committee on Fire Prevention Committee an ṭhukhawm a; March 15, 2024 aia tlai loah lo hâl vek turin an rêl.

Ṭhutkhawmnaa an rêl danin, March 15, 2024 ral hmain lo/huan hâl tur a ni a, hmunphiah hmun hâl turte chu March 31, 2024 thleng hun pek a ni dawn. Lengpui Airport leh a chhehvel khuate tan tlai dar 3:30 hnuah chauh lo hâl theih a ni ang.

February 5-9, 2024 chhungin kângmei vèn hapta, Fire Prevention Week hman an rêl a; hapta chhungin kângmei vên lam hawi inzirtirna uar zawka kalpui te, inzirtirna thehdarh nan print media leh electronic media-te hman ṭangkai se, sorkar pisa leh zirna-inah kângmei vèn hapta thutiam sawitirte an rêl bawk.