MYC chairman atan Malsawmzuala Ralte ruat

Mizoram sorkar chuan Mizoram Youth Commission (MYC) chairman atan nimin khan Malsawmzuala Ralte a ruat a; amah hi Aizawl Municipal Corporation (AMC) corporator ni lai a ni.

MYC chairman hian lawmman thla tin Rs 8,000 a dawng thei dawn a, Mizoram Youth Commission Rules, 2019-in a phalsak chin hamṭhatna (allowance) hrang hrang a dawng thei bawk.

Vanglaini thu dawn danin, Malsawmzuala Ralte hi MYC chairman ni mah se, AMC corporator aṭanga a chawlh kher a ngai lo a, hlawh erawh AMC emaw MYC emaw aṭangin a duh zawk zawk a la thei.

Malsawmzuala hi AMC Ward XVIII aṭangin kum 2021-a AMC inthlanah corporator atan thlan tlin a ni a, a bial chu - Mission Veng, Tuikhuahtlang, Model Veng, Thakthing Veng, Dam Veng, Veng­hnuai, Salem Veng leh ITI Veng te a ni.