An sorkar loh vanga zâm mai lo turin Thanzara'n Congress party mite a chah

Mizoram Pradesh Congress Committee (MPCC) senior vice president Lal Thanzara chuan, Congress party an sorkar loh avanga zâm mai lo tur leh Pathianin an party tan hun a la ruat lo a ni tih pawm turin an party mite a chah.

Lal Thanzara hian nimina Congress Bhavan-a political session-ah thu sawiin, "Kan sorkar loh avangin zâm mai lo ila, hma lam pan nan i hman ang u. Pathian hun ruatah Congress party hi ram hruai turin min ruat rih lo tih pawm ila, i zâm lo ang u. Pathian zâi ngai, Pathian hruaiin kan kal ang," a ti.

ZPM party-in MLA ṭhahnem tak neiin rorelna an chang mek tih sawiin Thanzara chuan, "Mipuiin enchhin an duh a, tunah hian kan enchhin mek a ni," a ti a, enchhinna hun chu hmang ṭangkai turin Congress party mi leh sate a chah.

Lal Thanzara chuan, "Politics hi tih fuh tum tan ni lo, ram leh hnam vei mite tana khelh chi a ni. Tih fuh tumte chu party hrang hrangah an zuang láwr dun dun a, ram leh hnam tan an chhenfâkawm loh," a ti a; sorkar loh vanga party danga awm kual ang chi chu a malsáwm lo niin a sawi.

ZPM sorkar chu kal dik an tum hle tih sawiin Lal Thanzara chuan, "Chutih laiin, hun kal tawhah Val Upa Council thu an zawm loh dante ngaihtuahin an kal dik a rinawm lêm loh. Inthlanah khan BJP pawisa an hmang tihte sawi a awm a, an hman leh hman loh chu kan hre chho zel dawn. An kal dan hi ngun takin kan thlir zel dawn a ni," a ti.

MPCC Senior Vice President chuan, Congress party chu Mizoram tana ro hlu tam tak dintu a nih thu sawiin, "Hydel project tam tak kan din a, Lengpui Airport kan siam a, medical college thlengin kan din. Tuna Lunglei kawng, World Bank kawng hi Congress-in bul kan ṭan a ni," a ti a; Congress sorkar laia hnathawh dangte a sawi lang bawk.