Inthlana tlâk hi MNF tan thil thar a ni lo - MNF Treasurer

MNF treasurer K Vanlalauva chuan, inthlana tlâk chu MNF tan thil thar a nih loh thu leh, ZPM sorkarin hna a thawh chhoh turte MNF bul ṭan a nih zel dawn thu a sawi.

K Vanlalauva hian nimina Mizo Hnam Rûna MNF chhung inkhawmah thu sawiin, "Inthlana tlâk hi MNF tan thil thar a ni lo a, kan paltlang fo tawh thil a ni. Tuna sorkarte auhla - Kalphung thar tih leh min enchhin rawh u tih hi thil thar a ni lo a, ZNP auhla kha ZPM-in an chhawm mai a ni," a ti.

MNF chu Mizo nationalism kengtu leh chawitu a nia sawiin K Vanlalauva chuan, "Ram tan theihtawp chhuahin hna a thawk ṭhin. ZPM sorkar hian thil thar an hawng chho zel dawn a, mahse, chutiang bul ṭantu chu MNF sorkar kha a ni zel ang," a ti a; MNF chu inthlanah vawi li tla tawh a nih avangin ram tan hna a thawk tak tak tih hriat belh zel a nih dawn thu a sawi.