RGSA hnuaiah VC house 150 sa tawh

Koladib bawrhsap John LT Sanga hoin January 18, Ningani khan DC conference hall-ah India rama tualchhung sorkar (village council) thuam chak tura hmalakna, Rashtriya Gram Swaraj Abhiyan (RGSA) chungchang inhrilhfiahna hun hman a ni a; Mizoramah Mizoramah panchayat bhawan (VC house) thar 150 sak a ni tawh tih an tarlang.

RGSA hi Ministry of Panchayati Raj hnuai niin, hmasawnna ngêlnghet leh tlo a awm theih nana VC-te tichak leh tihmasawnna tura ruahman a ni a; Mizoramah chuan Local Administration Department-in a kengkawh.

December 11, 2023 thleng khan RGSA kaltlangin Mizoramah panchayat bhawan (VC house) thar 150 sak a ni a, VC house 93 chei ṭhat a ni. Khaw hrang hrangah common service centre (CSC) 15 din a ni a, VC-te hnenah computer 243 pek a ni bawk.

Kolasib district bikah RGSA hnuaiah VC house sak thar 22 leh chei ṭhat 14 a awm a, VC 10 chuang hnenah computer pek a ni a, Pangbalkawn, Bairabi North leh Saiphaiahte CSC din a ni.

RGSA hnuaia Economic Development & Income Enhancement project kaltlangin hna lian tak pathum - Arecanut Leaf Plate Production Centre, Bilkhawthlir (nuai 49), Rural Homestay & Agro-Tourism Project, Tuipui-D (nuai 84) leh Handloom Design Training cum Production Centre, Thenzawl (nuai 141.23)-te thawh zawh a ni tawh. Hnahthial, Khawzawl leh Saitualahte District Panchayat Resource Centre (DPRC) sak mek a ni bawk.

India ram puma tualchhung sorkar ṭha lawmman National Panchayat Award sem ṭhinah kum 2021 khan Kolasib Venglai VC chuan Gram Panchayat Development Plan Award (GPDPA) a dawng a, award hian Rs 5,00,000 a keng a ni.