Hmunphiah sâwngbàwlna in hawng

FOCUS Mizoram state project director Lalengzami Haolai chuan nimin khan Kolasib district-a Saipumah hmunphiah sâwngbâwlna, Broom Processing Unit (Warehouse) sak thar hawng. Warehouse hi Saipum Broom Growers' Cooperative Society (SABCOS)-in cheng nuai 25 hmanga an sak a ni.

SABCOS chairman CS Lalthlamuanga tarlan danin, Saipum khuaah in 580 zinga 80% velin hmunphiah huan an nei a, kum tin hmunphiah a hringin quintal 10,000 - 13,000 vel an ṭhar a, hmunphiah hralhna aṭangin cheng nuai 300 - 400 vel an la lut ṭhin.

Saipum khuaa hmunphiah chíngtute hian hmunphiah an thar chu anmahni'n a man (rate) bithliah loin, a leitute'n a rate an bithliah ṭhin a; tunah chuan warehouse-ah hmunphiahte chu an dah khawm ang a, society kaltlangin an hralh ṭhin tawh dawn a ni.

Saipum Broom Processing Unit hi hmuhphiah quintal 150 vel lenna tura buatsaih a ni a, warehouse bakah, hmunphiah tihrona tur tunnel dryer, exhaust fan leh ceiling fan-te a tel.

Hmuhphiah sawngbawlna sakna atan SABCOS-in Rs 2,50,000 leh FOCUS Mizoramin Rs 22,50,000 an tum a, a vaiin cheng nuai 25 sênga sak a ni.