IAF sipai lâk rûnpui chungchang sawiho

Labour, Employment, Skill Development & Entrepreneurship secretary Lalramsanga Sailo pisaah nimin khan Indian Air Force (IAF), Agnipath Scheme Agniveervayu lâkna atana inziah luh dante sorkar leh sipai hotute'n an sawiho a; January 17 aṭanga February 6, 2024 chhungin online kaltlangin inziah luh hun hawn a nih thu an sawi.

IAF 11 Airmen Selection Centre hotu, Wing Commander BS Rathore chuan, IAF lak tur chu Mizo ṭhalai a tam thei ang berin hmelhriat se a duh thu a sawi a, scheme chungchang puanzar kawngah state sorkar chu thawhpuiah a sáwm.

Ṭhutkhawmah hian IAF sipai lak tur chungchang mipuia hriattir dan tur leh ṭhalaite'n beih an duh theih dan turte an sawiho a; Mizoram aṭanga dilte tam dan azirin Aizawlah exam centre buatsaih dan zawn ni se, an ti.

IAF sipai lâk turah hian mipa leh hmeichhia, January 2, 2004 leh July 2, 2007 inkara piang, pawl 12 pass tan dil theih a ni a; hre chiang duh tan agnipathvayu.cdac.in te, LESDE.mizoram.gov.in leh Empex.mizoram.gov.in ahte ngaihven theih a ni.

IAF SIPAI HAMṬHATNA

■ IAF sipaia tlingte'n kum 4 chhung thla tin Rs 30,000 - Rs 40,000 an hlawh ang.

■ Kum 4 an thawh hnuah a hlâwmin cheng nuai 11 pek an nih dawn.

■ Kum 4 an thawh hnuah IAF sipai zinga 25% chu thawk chhunzawm ang.

■ Thawk chhunzawm lo tur 75%-te chu central leh state sorkarah leh corporation-ahte an luh theih nan hmalakpui an ni ang.