KHAWTHLIR

YMA-in thisen pe

YMA, Kolasib Diakkawn Branch chuan an din champha vawi 66-na pualin nimin khan Kolasib District Hospital tan thisen unit 74 an pe a, petute mipa 50 leh hmeichhia 24 an ni.

Band intihsiak

Mizo High School mipa pipe band chu kumin Republic Day puala ram pum huap sikul band-te inelna, National School Band Competition-ah Eastern Zone aiawhin an tel dawn. Inelna hi New Delhi-a National Stadium-ah January 21-22, 2024 chhungin neih a ni ang. Inelnaa tel tur hian India ram chu zone pali-ah ṭhen a ni a; category pali-ah inel tur niin, India ram hmun hrang hranga sikul 16-a band-te an intihsiak dawn a ni.

Kawng khâr dawn

Champhai bawrhsap James Lalrinchhana chuan Champhai leh Zokhawthar inkar (NH-6) kawngpui siam mekah Melbuk pêng aṭanga Zokhawthar inkar kawng chu January 20, 2024 (vawiin) aṭangin siam hna zawh a nih hma chu lirthei tlân khap a nih thu a tarlang. Kawng siam chhungin Champhai-Zokhawthar kawng hlui (via Melbuk)-ah lirthei zawng zawngte kal tur a ni.

Reiek block tlawh

NITI Aayog hnuaia North East State regional lead Dr Priscilla C Ngaihte leh Touth Professional Siddharth Bagaria te chuan nimin khan Reiek RD Block an tlawh a; khaw mipui, village council member, YMA, MHIP, MUP leh department mite nen an inkâwm.

MLA-in hawng

East Tuipui bialtu MLA Ramthanmawia chuan nimin khan a bial chhunga Khuangthingah a MLA fund Rs 4,00,000 sênga sak Studens Union Office-cum-Library a hawng. SASCI 2022-23 sum hmanga sak mek Khawbung Bazar Shed Phase-I leh Khawbung HSS Girls Hostel a tlawh bawk.

Siaha VBSY khâr

Siaha RD block chhunga sorkar laipui scheme-te mipui leh a dawngtu turte'n hamṭhatna an dawn theih nana inhrilhfiahna leh inziah luhna tura hmalakna, Viksit Bharat Sankalp Yatra (VBSY) chu nimin khan Siaha Vaihpi Traffic Point-ah khâr a ni.