Sorkarin industry-ah hmalak nasat a tum; Dodalna karah kan tawlh dawn lo - CM

Chief minister Lalduhoma chuan January 20, Inrinni khan CMO conference hall-ah thuthar thehdarhtute a kâwm a; sorkarin industry-ah nasa taka hmalak a tum thu a sawi a, "Corruption kan donaah dodalna nasa mah se, kan tawlh dawn lo," a ti.

Chief Minister hi kar liam taah khan North Eastern Council 71st Plenery Session Meeting, Shillong-ah a tel a, January 20 khan rawn haw in, thuthar thehdarhtute a kâwm nghal a ni.

Thuthar thehdarhtute zawhna chhangin Chief Minister chuan, corruption-in Mizoramah zung a kaih thûk tawh thu a sawi a, "Ngaiah an lo nei tawh a, dan a ni lo tih pawh an hre tawh lo. Hei hi tihtâwp kan tum," a ti.

Lalduhoma chuan, corruption do turin khua an tlai ṭêp nia sawiin, "Tunah hian sorkar loin, a ngai sorkar se chuan a lehpekah sorkar ila kan titawp thei tawh lo mai thei," a ti a, corruption tihtawp an tumnaah dodalna a nasat thu a sawi.

Dodàlna nasa mah se, an paltlang dawn thu sawiin CM Duhoma chuan, "Dan anga thil tih pangngaia neih hun a thleng mai ang. Mi hawtu pawh an tam ang, mahni hlawh pawh ring loa khawsate pawh an awm tawh. Chu'ng mite chuan min haw ngawt ang," a ti.

Lalduhoma chuan, an hmalakna avangin inthlan leha an tlâkna tura bei an awm dawn tih sawiin, "Mahse, kan táwn tlang dawn," a ti a; tlâk phah dawn pawh ni se corruption do kawngah hnungtawlh an tum loh thu a sawi.

NEC ṭhutkhawmah investment lam uar taka sawi a ni tih sawiin Lalduhoma chuan, "Single window system-in kan kal dawn. Kan ramah investment tih a nih dawnin clearance hrang hrang lâk a ngai a, a kum a kum a duh ṭhin. Chu chuan phûrna a tihreh duh bakah, hun a heh em em a ni," a ti.

Chief Minister chuan, clearance lâk ngaite buaipuitu bik siam a nih dawn thu sawiin, "Chu'ng mite chuan tlan ngai zawng zawngah an tlansak vek ang. Rei lo teah clearance an nei thei tawh dawn a ni," a ti a, awlsam taka industry din theih a nih dawn thu a sawi.

Industrial state lian taka invawrh an tum thu sawiin CM Duhoma chuan, "Chu chu kan ṭhalaite hmakhua, kan ram hmakhua a ni. Ṭhalaite chak taka an kal a ngai dawn. Sorkarin chak takin ṭhalaite hnuh a tum a, ṭhalaite'n sorkar ûm pha se kan duh," a ti.

Lalduhoma chuan, Confederation of Indian Industry-in an ṭhutkhawmah an sàwm thu sawiin, "Chanvo lian tak pawh min pek an tum. Chu'ng hunah chuan investment lamah remchanna nasa lehzualin a awm dawn," a ti a, India ram chhung leh páwn aṭangin Mizoramah investment ti duh an tam thu a sawi.

Chief Minister chuan, investment rawn ti duh nazawng an duh dawn bik loh thu sawiin, "Kan tana ṭha tur, hnawksak lo tur, kan ṭhalaite dîp lo tur ngaihtuah a ngai. Tunah chuan thawkho a, tualchhung miin a hnua an thlak theih tur kan dap thiam a pawimawh," a ti.

NEC meeting-ah hian hand holding policy chungchang a sawi chhuah thu sawiin Lalduhoma chuan, "NEC scheme-te nena convergence (kaikawp)-a kalpui theih dan turte ka sawi," a ti a, bána kaih chu ṭha taka kalpui a nih tur thu a sawi.

Zu zawrh leh zawrh loh chungchanga zawhna chhangin Chief Minister chuan, "Kan agenda hmabak a ni. Mipui huapin inràwnkhawmna kan buatsaih dawn," a ti.

Chief Minister sawi danin, zu chungchang chu sorkarin a ennawn ngei dawn a, engtin nge kalpui a nih dawn tih erawh sawi theih a la ni lo.

CM THUSAWI TLANGPUI

▶ Industry din tura clearance lâk ngaite buaipui tur bik kan siam dawn.

▶ Non industrial state aṭangin industrial state lian takah invawrh kan tum.

▶ India ram chhung leh pawnah kan rama investment ti duh an tam.

▶ Inthlan lehah tlâk phah dawn pawh ni ila, corruption doah hnungtawlh kan tum lo.

▶ Zu chungchang hi kan agenda hmabak a ni a, mipui huap inrawnkhawmna kan buatsaih ang.