Shillong-a damlo awmna tur in a bul aṭangin sak ṭhattir a ni

NEIGRIHMS, Shillong bula Mizoram damlote awmna tur in, patient lodge sak mek chu an sak dan a ṭhat tâwk loh avangin a bul aṭanga sak ṭhattir leh a ni.

Chief minister Lalduhoma'n January 20, Inrinnia thuthar thehdarhtute a kawmnaah patient lodge chungchang a sawi chhuak a, "Mi pakhatin contractor pakhat hmingin he hna hi a hmu a, a thawh hleih theih loh bakah, a thawk chhia. NEC fund hmanga sak a ni a, an lungawi lo a, tihtawp an tum," a ti.

Shillong-a Mizote pawh an mangan thu sawiin Lalduhoma chuan, "Hna hmutu tak chuan a khawih tawh lo. A hming neitu contractor chu tlawmngaia thawk chhunzawm turin kan ngen a, a hmaa miin a lo thawh tawh kan chhut chhiattir," a ti a, a tharin hna an ṭantir thu a sawi.

CM Lalduhoma chuan, in sak mek chu chhut chhiat ni mah se, sum ruahman zat a pung thei chuang lo tih sawiin, "Contractor a hlâwk vak dawn lo. Kum hnih chhunga zawh tur kum khat chhunga zawhtir kan tum. December velah chuan zo tawh turin kan ti a, a zawh chiah loh pawhin a hriatthiamawm khawp ang," a ti.

Patient lodge sak ṭhat mekin mit a tlun thu sawiin Chief Minister chuan, "10%-a tihpun dan kawng a awmin kan hria a, NEC-ah kan thehlut ang," a ti a, ruahmanna hmasaa awm lo tuichhunchhuah pawh ti nghal tura an tih thu a sawi.