LESDE Minister-in Central hotute a kâwm

Labour, Employment, Skill Development & Entrepreneurship minister Lalnghinglova Hmar chuan January 19, 2024 khan Delhi-ah LESDE department kaihhnawih sorkar laipui hotute a kâwm a, kutthemthiamna lama Mizoram tihhmasawn dan tur a sawipui.

Lalnghinglova Hmar hian sorkar laipuia Ministry of Skill Development & En­tre­preneurship sec­retary Atul Kumar Tiwari kâwmin, Mizorama kut­themthiamna tih­hmasawn leh kut­kawih eizawkna lama hma­sawnna awm theite a sawipui a; Mizorama hma­lakna kalpui mekte leh hmalakna thar awm theite a hrilh.

Atul Kumar Tiwari chuan, Mizoramin a tih theih, a la tih si loh ṭhen-khatte sawiin, sorkar lai-puiin thiamna tihhma-sawn lam leh kutkawih eizawnna lam a ngaih pawimawh êm avangin kawng hrang hrangah Mizoram tan hmalakna tur tam tak a awm thu a sawi a; Mizoram mila ruahmanna siam a nih chuan puih a inhuam thu a sawi bawk.

LESDE Minister hian Atul Kumar Tiwari chu Mizorama zin a, hmalakna awm theite leh hmasawnna awm theite a hmuna en turin a sáwm a; Secretary pawhin hun remchang hmasaah Mizorama zin a tum thu a sawi.

Minister Lalnghing-lova Hmar hian Micro, Small and Medium Enter­prises secretary SCL Das pawh a kâwm a; Mizoram sorkarin Hand Holding Policy a ruahman dan leh a kalphungte hrilhin, chuta tan chuan Ministry of MSME scheme hrang hrang chu a ṭangkai thei dawna a hriat thu a sawi. MSME hnuaia hmalakna chu investment sang lutuk lo, hun rei tak nghah ngai lo, rah chhuah zung zung thei a nih vangin Mizo rilru sûkthlêk nen pawh a inmil thu a hrilh bawk.