Minister B Lalchhanzova'n sorkar laipui hotute a kâwm

Minister of state B Lalchhanzova chuan January 19, 2024 khan department a enkawl - Food Civil Supplies & Consumer Affairs leh Land Revenue & Settlement kaihhnawiha sorkar laipui hotute a kâwm.

B Lalchhanzova hian sorkar laipuia Land Resource secretary Nidhi Khare kâwmin, Mizorama hmalak mekna leh hmachhawpte a sawipui a; ram teh leh chhinchhiahna (land record) chak zawka kalpui theih dan tur te, ram lei leh hralh leh thil danga ram inchuh buaina nasa lutuk tih ziaawm theih dan tur leh Digital India Land Record Modernisation Programme hmanga hmalak mek dante a sawipui.

Minister hian Food Corporation of India (FCI) chairman Ashok Kumar Meena chu a pisaah a kâwm a; buhfai chungchangah FCI chu nasa zawka an inzar zauh a ṭul thu a sawi. Mizoramah FCI kudam sak belh a ṭul thu te, FCI Division hawn a ṭul thute thlenin, buhfai lei zui zel dan tur an sawi dun bawk.

B Lalchhanzova hian Ministry of Consumers Affairs hnuaia Food & Public Distribution economic adviser Kamkhenthang Guite pawh a kâwm a; Mizorama centre leh home hrang hrangte tana buhfai man tláwm chi sorkar laipuiin a pek mekna Welfare Institution Scheme chungchang a sawipui.

Sorkar thuchhuah tarlan danin, sorkar laipuia Food & Public Distribution hian Mizoram tan Welfare Institution Scheme quota quintal 212 leh Consumer Welfare Fund cheng nuai 500 an sanction nghal a; Mizoramin buhfai a leina atan State Level Price Stabilisation Fund hnuaiah ruahmanna an siam mek bawk.