KHAWTHLIR

Minister biak theih hun buatsaih

Minister K Sapdanga chuan January 20, Inrinni khan Chanmari Local Council House-ah a bial, Aizawl North-III chhunga mite tan amah biak theih hun a buatsaih. K Sapdanga hian chawhmaah Chanmari West, Hunthar Veng leh Edenthar Veng mite tan hun hawngin, chawhnuah Chanmari, Zarkawt leh Electric Veng mite tan hun a hawng a; veng hrang hranga LC-te leh pawl hrang hrangte bakah, mimal eng emaw zatin an thil pawimawhte an thlen a ni.

LC House hawng

Aizawl Municipal Corporation (AMC) Ward-III corporator C Lalchhandami chuan a bial chhunga Ramhlun North Local Council House sak zawm thar chu January 20, Inrinni zing khan a hawng. In hi kum 2022-23 Property Tax return sum Rs 2,40,000 hmanga sak a ni.

Chawngtlai tlawh

Khawzawl bawrhsap K Lalrohlua chuan January 20, Inrinni khan Chawngtlai a tlawh a, hmasawnna hnathawhte a enfiah. Lalrohlua chuan, Khawzawl bawrhsap a nih chhungin Chawngtlai khua chu ‘Khawzawl DC Model Village’ atan a puan thu sawiin, zirna, eizawnna leh hriselna lamah hma an sawn zel theih nan theihtawp a chhuahpui tur thu a sawi.

Signature campaign

Hnahthial District Election Office chuan January 20, Inrinni khan Tuipui-D khuaah special campaign an buatsaih a, signature campaign an nei nghal. Campaign hi Systematic Voter’s Education & Electoral Participation hnuaia buatsaih a ni a, electoral roll ennawn mek pualin rualbanlo voter-te leh kum 18 tling tharte electoral roll-a inziah luhna theihna leh awlsam zawka inziahluh theih dan leh hamṭhatnate an inhrilhfiah a ni.

Enrolment drive

Khawzawl District Election Office chuan January 20, Inrinni khan Khawzawl district-a higher secondary school zirlaite electoral roll-a an inthun luh theih nan special enrolment drive a buatsaih. He hun hi Khawzawl election officer Timothy R Lalhmangaiha leh assistant electoral registration officer Elijah LH Sanga ten an kaihruai a, electoral roll-ah zirlai mi 36 ziah luh thar a ni.