Congress councillor-te'n Hawla lawmpui

Aizawl Municipal Corporation (AMC)-a Congress party councillor-te chuan Serampore College (University)-in Mizoram chief minister hlui leh Mizoram Pradesh Congress Committee (MPCC) president Lal Thanhawla hnena Doctor of Divinity a hlan chu Aijal Club lounge-ah an lawmsak.

Lal Thanhawla'n DD a dawn lawmna inkhawm hi councillor Zohmingthangi'n a kaihruai a, councillor Zodingpuii'n hunserh hmangin, councillor Zonunsangi Fanai-in lawmpuina thuziak a hlan a; councillor Vanlalruata'n an hmalakna hrang hrang a sawi bawk.

Lal Thanhawla chuan, chawimawina sang doctorate degree a dawn phak turah a ngái ngai lo tih sawiin, "A dawng ka hriatte hi an ropui hlawm em avangin a mak pawh ka ti tak zet a, Pathianin thil ropui tak min tihsak a ni tih bak chu sawi tur ka hre lo. Pathian ṭhatzia a lang chiang hle a ni," a ti a; amah lawmpuitu AMC councillor-te chungah a lawm thu a sawi.

Serampore College (University) chungchang sawiin Lal Thanhawla chuan, "India ram mai ni lo, Asia khawmualpuiah pawh theological college upa ber pawl a ni a, affiliated college pawh 40 chuang zet an awm. Hetiang khawpa theological college hlun leh Mizote'n inzawmna nghet tak kan nei pawh hi a hlu hle a ni," a ti.

Lawmpuina inkhawmah hian Congress party councillor-te bakah, MPCC office bearer-te leh party hruaitu pawimawhte an tel a; Congress party chuan AMC-ah hian councillor 19 awmah councillor pasarih an nei mek a ni.