Speaker-in NDMA member a kâwm

Legislative Assembly speaker Lalbiakzama chuan January 19, 2023 khan National Disaster Management Authority (NDMA) member Krishna S Vatsa a pisaah a kâwm a; National Earthquake Risk Mitigation Project, Forest Fire Management Programme leh State Disaster Management Fund aṭangin sum pek a inhuam thu a lo hrilh.

Lalbiakzama leh Krishna S Vatsa te hian chhiatrupna thleng thei laka Mizoram invên lâwk theih dan tur leh chhiatrupna thlengin nghawng nasa zawk a thlen theihte tihnêp a nih theih dan (preparedness & mitigation) chungchang an sawi dun a ni.

Krishna S Vatsa chuan, National Earthquake Risk Mitigation Project (NERMP), Forest Fire Management Programme (FRMP) leh State Disaster Management Fund (SDMF) aṭangtein fund ṭhahnem tak pek a inhuam thu leh inrelbawl dan kalphung erawh a duhkhawp loh thu a sawi a; insiamrem hmasak a ngai nia a hriat thu Speaker a lo hrilh.

Lalbiakzama hian Mizorama zin turin NDMA member Krishna S Vatsa chu a sáwm a; kumin fûrpui hma ngeia Mizoram tlawh a, Mizoram dinhmun dik tak leh Mizoram tana thil ṭha zawk tur nia a hriatte a hmun ngeia enho a duh thu Krishna S Vatsa pawhin a sawi.

Assembly Speaker hi Delhi Mizoram House additional resident commissioner Alexander V Chongthu leh Legislative Assembly committee officer Rosangliana Chhakchhuak ten an ṭawiawm a ni.