NE zingah BJP sorkar siam lohna awm chhun Mizoram - BJP President

BJP, Mizoram Pradesh president Vanlalhmuaka chuan, India hmarchhak state zingah BJP tel loa sorkar siamna awm chhun chu Mizoram chiah a nih thu leh, politician-te mitdâwivaih lakah Mizoram mipui an tâl chhuah a ngaih thu a sawi.

Vanlalhmuaka chuan January 19, 2024-a an party pisaa political session-ah thu sawiin, "NE state zingah BJP sorkar lohna leh BJP nena sorkar siam lohna awm chhun chu Mizoram chiah a ni. Election laiin BJP hlauhawmzia leh Pu Modi sorkar hlauhawmzia hmangin kan state-a political party tinin vote zawngin, kan politician-te'n mitdawivaih hmangin Zoram mipui mit an tivài a, mipuite thutak hmu fiah thei loin an siam a ni," a ti.

Inthlan zawhah erawh chuan Narendra Modi sorkar hnenah medical college leh airport-te an zuar nia sawiin Vanlalhmuaka chuan, "Púr chaw turin kan zuk intlânsiak leh. Mahni aia fing zawk leh thil ti thei zawk bum kan tum ṭhin hi chu thil âtthlâk a ni. Politician-te'n mipui mit min dawihvaihna thanga kan tànna hi mipui hian kan hmuh fiah thiam a, kan tâl chhuah a ngai tawh a ni," a ti a; Mizoram mamawh ber chu ram leh hnam tana chhenfâkawma hnathawk thei sorkar a nih thu a sawi.

BJP President chuan, "Rawngbawltu tam tak hian Mizote hian India ram chhungah chanchin ṭha hi kan thawn chhuah pui ber a ni an ti fo. Mahse, kan ṭhenawm state-te leh India ram hian min hmuh dan chu chanchin ṭha kan export emaw kan tih lai hian, chanchin ṭha lo zawk, Mizoram chu corruption tamna, drug leh smuggling tamna, natna chhe ber ber tamna state-ah min ngai thung si hi a ram leh a hnam ang pawha kan ṭhanharh a ngaihna lai a ni," a ti.