MYC Chairman-in lawmpuina hun a hmanpui

Mizoram Youth Commission (MYC) chairman thar Malsawmzuala Ralte chuan MS Academy, Khatla-in an zirlai hlawhtlingte lawmpuina hun an hman a hmanpui.

MS Academy hi competitive exam coaching centre a ni a, MSSSB Combined UDC Exams 2023-a inziak tling mi 20 hnenah lawmpuina an hlan a; lawmpuinate chu MYC Chairman-in a dawngtute hnenah a hlan a ni.

Malsawmzuala Ralte chuan, MSSSB exam hautak tak paltlangtu zingah MS Academy-a inzir mi 20 an tel chu a lawmpui thu sawiin, "Ṭhalai tumruh, taima, leh teirei peih tan hlawhtlinna kawng a inhawng a ni tih mi 20-te aṭang hian a lang a ni," a ti a; competitive exam chu eng level pawh ni se, thil awlái a ni lo a, theihtawp chhuaha beih ngai vek a nih thu a sawi.

Hun hman dan tur mumal taka ruahmanna siam a pawimawh thu sawiin Malsawmzuala chuan, "Hun vawn dik a pawimawh a, hun vawng dik mi an inthlahdah ngai lo," a ti. Sorkar hna chu ram tana rawngbawlna pawimawh a ni tih hria a, taima leh rinawm taka thawk turin a chah a; hna ṭha tak an neih tawhah duh tâwk mai lo a, competitive exam sang zawk bei zel turin a fuih bawk.

MS Academy hi August 9, 2019-ah hawn a ni a, Mizorama competitive exam (group A & B) tumte tana coaching pekna a ni.