Police-in crime review meeting nei

January 19-20, 2024 khan Police Headquarters-ah DGP Anil Shukla hoin Annual SPs Crime Review Conference neih a ni a, Additional DGP, IGP, DIG leh AIG te, district leh police unit hrang hrang SP te, Mizoram Armed Police (MAP) leh India Reserve (IR) battalion-a commandant-te an tel.

DGP chuan, police officer-te chu ṭang lehzuala hna thawk chhunzawm turin a fuih a, "Ramri hnaih khuate ngun lehzuala vil te, mipui nena inpumkhatna leh thawhhona uar lehzual te, ruihhlo tawlh rûkna ngawrh lehzuala do leh rûkrûk leh mi in rawkte tihziawm a nih theih tura hmalak kawngahte ṭan lak thar a pawimawh," a ti.

IGP (Intelligence) Veenu Bansal chuan, tunlai thiamna mila police hna thawh (smart policing) kawnga state dang police-te hmalakna hrang hrang a tarlang a; police officer-te chu Mizoram Police-in a hman tangkai theih tur thilte dapa ngaihtuahna sêng turin a chah.

Champhai SP Vineet Kumar leh Champhai SDPO-te chuan, Myanmar aṭanga ruihhlo tawlh rûk a nih dan leh a kalkawng te, Myanmar ram chhung buaina leh Manipur buainain nghawng a neih dan te, NDPS Act thubuaia sum kaihhnawih thil chhui dante leh ruihhlo tawlhtute'n dan kalha an neih bungraw enkawl zui dan chungchangte an tarlang a ni.