KHAWTHLIR

Mi 3,022 tir tawh

Labour Employment & Industrial Training minister Lalrinmawia Ralte chuan, MNF member Dr. K Beichhua zawhna ziaka chhangin, Skill Development Initiative Scheme (SDIS) fund hmangin modular employable skill training turin Mizo ṭhalai 3,022 an tír chhuak tawh tih a tarlang a, "Mi 2,560-in an zir chhuak tawh a, mi 1,148-in hna an hmu tawh," a ti.

Lungin delh hlum

March 31, 2016 chhun dar 12:30 vel khan Tlungvel quarry-a lung tlain Judith Lalremkimi (17) d/o Lalnunthara, Tlungvel a delh hlum. Tlungvel aṭanga thu dawn danin, HSSLC result nghak Lalremkimi hi a pu quarry-a rawra chhu turin a ṭhiante nen an kal a, chhak lam aṭanga lung tlain a delh a ni. Thingsulthliah damdawi-in panpui a nih hnuah Synod Hospital panpui a nih laiin chawhnu dar 3:30 velah a hliam tuar loin a thi a ni.

Bye-election

Mizoram State Election Commission chuan thuchhuah siamin, Mandirasora bialtu MDC a thih avangin a hmun ruak hnawhkhah tur zawnna atan April 28, 2016-ah bye-election buatsaih a nih dawn thu a puang.

In kâng

March 31, 2016 tlai dar 4:30 vel khan Bairabi Zohlun venga Zoliankhuma in a kang a, bungrua chuh hman lohin a kâng ral. A bula Malsawmdawngzela in tlem a-zawng a kang tel bawk. Thu dawn danin, Zoliankhuma in bula an workshop chu ṭêkin déngin a kâng zui a, kângmei chhuak chuan an chenna in a kâng kai a ni.

Clean Kawnpui

Ningani khan Awithangpa Hall-ah Swacch Bharat Mission hnuaiah Clean Kawnpui Campaign buatsaih a ni a, parliamentary secretary Hmingdailova Khiangte in a hman pui.

Officer pension

IPR joint director Lalsiamliani chu nimin khan sorkar hna aṭangin superanuation pension-in a chhuak. Lalsiamliani hi nimin khan IPR Auditorium-ah IPR department-a a thawhpuite leh MJA member-te'n thlahna hun an hmang a ni.