CM Hawla'n eptu MLA-te a fak

Chief minister Lal Thanhawl-a chuan, nimin khan Congress Bhavan-a an party inkhawmah thu sawiin, Assembly budget session neih zawh tâka eptu member chet dan a fakawm thu a sawi.

Lal Thanhawla chuan, a kaihhruai sorkar chu opposition lam tan sawi chhiatna tur a awm lo a, an fak lo thei lo nia sawiin, "A chhan chu kan opposition member-te thu dikah an ṭang ngam a, huaisen takin thurâwnte min pe ngam a. An hotute nen an inang lo a, kan opposition member-te an fakawm hle a ni," a ti.

MPCC President chuan, MNF ṭhalaite’n State Referral Hospital chu MNF sorkar laia an tih ang-ah an sawi leh ngawt tawh nia sawiin, "An tih âwm tak a ni," a ti a; NLUP hnuaia cheng nuai khat sem chungchang sawiseltute'n cheng nuai thum an sem theih a rin loh thu a sawi bawk.

Finance minister Lalsawta pawhin thu sawiin, “Mizoram leiba a tam tih sawi ṭhin mah se, bat hnem hian awmzia a neih chuan changkanna a ni. Remruatna leh inbuatsaihna ṭhaah chuan leibá hi kan nei ngam. Mahse, MNF sorkar lai anga kêl pal leh êk-in kal thei mai mai lei nan chuan leibá hi kan nei tur a ni lo,” a ti.