Smart Cities Mission project Aizawla kalpui dan tur sawiho

Aizawla Smart Cities Mission project kalpui dan tur leh sorkar laipuia bawhzui dan tur ngaihtuahin, nimin khan Secretariat conference hall-ah UDPA secretary Dr C Vanlalramsanga hoin sorkar official-te an ṭhukhawm.

Smart Cities Mission kalpui mekah hian Aizawl chu second stage-a khawpui 23 thlan zingah a la tel a; sorkar laipui ruahman angin, April 15, 2016 ral hmaa ruahmanna thehluh tur a nih avangin, sorkar laipuia ruahmanna thehluh turte an sawiho.

Dr C Vanlalramsanga chuan, Smart Cities Mission din chhan leh kalpui tum dante a sawifiah hmasa a; chumi hnuah Aizawl khawpui Smart City-a siam nana ruahmanna an lo duan chhinte chu thlirhoin, hmalakna tura ṭul leh pawimawh rawtna hrang hrangte an sawiho a ni.

Smart City Mission hnuaia hmalakna atan hian khawpui tâwt tihziaawmna tur te, kea kalte tana him leh nuam zawk siam te, motor dahna (parking) tam zawk siam te, auditorium leh sport complex siam te, zirna in tihchangtlunna te, mipui hriselna lam tihchangtlunna te, LED streetlight hman uar te, market tihchangtlun te, bus leh taxi changkang zawka ruahmanna leh thil dangte a tel.