Siamṭhat ngai lai hre chiang ber tur chu Police-te an ni ngei ang - Home Minister

Home minister K Sapdanga chuan nimin khan Police Headquarters-ah mobile forensic van thar pali a vailiam a; Mizorama siamṭhat ngai lai hre chiang ber chu police-te an nih thu a sawi a; police officer-te chu insiamrem ngai laiahte February 2024 chhunga insiamrem zawh hman tum turin a chah.

K Sapdanga chuan, Arya Mess-a inkhawmah police officer-te hmaah thu sawiin, mipuiin sorkar lakah beiseina sang tak an neih thu a sawi a, "Ram siamṭhat hnaa hma hruai tur, mawhphurtu lian ber chu keini police-te hi kan ni a, police officer-te hi kan ni lehzual. Police-te mawhphurhna chu mipuite hlim leh thlamuang taka awmtir a ni," a ti.

Tuna Mizoram dinhmun, siamṭhat ngai lai leh siamṭhat dan tur hre chiang bertu chu police-te an nih thu sawiin Sapdanga chuan, "He hna hautak zet thawk tur hian police-te in ṭha tawk. Kan ṭangrual ang a, ṭhahemngai takin kan thawk ang a, kan hlawhthling ngei ang," a ti a, a bul ṭanna atan inthunun a ngaih pawimawh thu a sawi.

Home Minister chuan, tun hnaiah ramri vengtu sipaite a tlawh kual thu sawiin, "Border out post tinah awm tur zat an awm daih lo vek tih leh ram venhim hna an thawk rim tak zet tihte ka hmu. Police check post dang ka tlawh chhunahte pawh, kan police duty-te an indaih loin an thawk rim hle a ni," a ti.

Police-ah post ruak a tam thu sawiin Home Minister chuan, "Post ruakte hi hnawhkhat turin state sum dinhmunin a tlin rih lo. Ram pumah ṭangkai zawka hnathawk thei turin kan tih theih apiang kan dap khawm a ngai," a ti a, Mizoram Police-ah thawktu mi 8,000 vel leh post ruak 4,000 vel a awm mek thu a sawi.

K Sapdanga chuan, police inenkawl dan rules/manual an neih thu sawiin, "Kan officer-te'n hlâwk zawka hna an thawh theihna turin PSO, orderly, driver, cook leh lirthei kawl phalsak chin mumal tak a awm. Kan officer châwl tawhte pawh duat zui a châkawm, mahse, sipai kan indaih lohzia leh indaih loh dan kan hre vek a ni," a ti.

January 8, 2024-a Home department thuchhuak angin, danin a phalsak chin anga khawsa turin police officer-te an insiamrem mek avanga lawmawm a tih thu sawiin Sapdanga chuan, "Tuna sipai awm mekte hi hna thawk thei turin kan intuai hriam phawt ang," a ti a, lirtheite pawh a kawl turin kawl phawt se an duh thu a sawi.

Home Minister chuan, insiamrem hnuah mamawh dan azirin hmun ruak hnawhkhah leh lirthei lei belhte an la ngaihtuah tur thu sawiin, "February chhung hian insiam rem zawh hman kan tum dawn nia. Loh theih loha siam rem ngai an awm loh ka beisei. Kan ram siamṭha a, danglamna thlen turin ṭha taka kan thawhho ka beisei," a ti.

DGP Anil Shukla pawhin thu sawiin, district hrang hranga police-te chu hlemhlêtna laka fihlim tura an inchah thu leh, Mizoram hmasawnna atan police-te chu an ṭangkai ngei an inbeisei thu a sawi.

Home Minister-in a vailiam tâk mobile forensic van pali hi Aizawl, Lunglei, Champhai leh Kolasib-a District Executive Force-te hman tur a ni a, Assistance to States for Modernization of Police tih hnuaia lei a ni.

Pali zinga pathum chu basic model niin, pakhat chu higher model a ni a, National Forensic Sciences University, Gujarat leh Kwick Soft Solution, Chennai-te kutchhuak a ni. Model sang zawk chu Rs 82,53,482 man a ni a, basic model chu pakhat Rs 44,99,999 man a ni thung a; van pali man belh khawm chu Rs 2,17,53, 479 a ni.

Mobile forensic van-te hi general investigation kit, narcotics detection kit, explosive detection kit, DNA collection & sexual assualt kit-tea thuam a ni a; higher model chu digital evidence investigation kit leh nano pro digital investigation kit-a thuam belh a ni bawk.

HOME MINISTER SAWI TLANGPUI

▶ Police-te mawhphurhna chu mipui hlim tak leh thlamuang taka awmtir a ni.

▶ Ram siamṭhat hna hautak zet thawk turin police-te kan ṭha tâwk.

▶ Border out post tinah sipai awm tur zat an awm lo vek.

▶ Police officer-te'n PSO, orderly, driver, cook leh lirthei an kawl phal chin mumal tak a awm.

▶ Loh theih loha siamrem ngei ngai an awm loh ka beisei.