LADC CEM V Zirsanga leh mi dangte hrem dan tur Special Court-in a puang

Aizawl District Court-a Special Court (Prevention of Corruption Act) chuan Lai Autonomous District Council (LAC)-a chief executive member ni lai V Zirsanga chu sorkar sum eiruk vangin kum li chhung tang tur leh Rs 4,00,000 chawi turin a hrem a; mi dang 33 a hrem bawk.

Special Court (PC Act) judge Dr HTC Lalrinchhana sentence order-a a lan danin, V Zirsanga hi LADC executive member i/c Education (Middle School) a nih laia sum tihchingpen avangin IPC Section 120B leh 420 IPC leh, PC Act Section 13 (1)(d)/13(2) tlawhchhanin kum li chhung lung-ina táng tur leh Rs 4,00,000 chawi tura hrem a ni a; pawisa a chawi loh chuan kum hnih dang a tàn belh ang.

V Zirsanga hian a thurualpuite nen Rs 1,33,56,884 an tichingpen a, chuta ṭang chuan cheng nuai 21 a chang a ni. Amah leh a thurualpuite chu Special Judge (PC Act) chuan January 19, 2024 khan thiam loh a chantir tawh a; sum tihchingpen hun lai chu kum 2013 a ni.

Sum tihchingpen hun laia Lawngtlai district education officer Lalduna Chinzah chu kum li chhung táng tur leh Rs 6,00,000 chawi tura hrem a ni a, pawisa a chawi loh chuan kum thum dang a tan belh ang. A pawikhawih a râwvâ hle chungin kum upa tawh, kum 82 a nih tawh avangin Court chuan hremna a pe nêp deuh tih a tarlang.

Lalduna Chinzah hian Rs 73,37,220 a eiru a, a hnen aṭangin NC Muankima'n Rs 50,00,000 a la a, Rs 50,00,000 aṭangin NC Muankima hian Lalchawiliana nen Rs 29,00,000 an khawih chingpen leh bawk.

A hun laia Thingkah M/S headmaster NC Muankima, Middle School Teachers Association (MSTA) Lawngtlai Sub-Headquarters president ni bawk chu sum tihchingpennaah a meizang hlaptu ber (prime accuse) a ni a; Court chuan kum nga chhung tang tur leh Rs 6,00,000 chawi turin a ti a, pawisa a chawi loh chuan kum thum dang a tàn belh ang.

MSTA Lawngtlai secretary C Lalchawiliana chu sum tichingpentute thurualpuitu a nih avangin kum li chhung táng tur leh Rs 4,00,000 chawi tura hrem a ni a; pawisa a chawi loh chuan kum hnih dang tàn belh tura tih a ni bawk.

Dan loa thil tih leh lehkha (document) lemte hmanga zirtirtu leh thawktu dang atana lak mi 30-te chu thiam loh chantir an nih angin, Rs 6,00,000 ṭheuh chawi tura tih an ni a, pawisa an chawi loh chuan kum thum chhung táng tura tih an ni.

Mi 30-te hi IPC Section 420 (r/w IPC 471) hmangin thiam loh chantir ni mah se, táng tura tih an ni tawh lo a; an lo tàn tawh zat chu Court-in a tâwkah a ngai. Pawisa an chawi tur zat hi dan dik loa lak an ni a, zirtirtu an nih chhunga an hlawh chhuah tam lamte leh hnu chhuina leh court rorelna senso atana sorkar sum hautakzia ngaihtuah tel a ni.