Ramri chungchanga ding nghet turin MP K Vena'n Mizoram sorkar a chah

Rajya Sabha MP K Vanlalvena chuan, Myanmar leh Mizoram ramri chu Mizo mipuiin hung an remti lo tih sawiin, Mizoram sorkar chu ramri chungchangah nghet taka ding turin a chah.

Nimina Mizo Hnam Runa inkhawmah K Vanlalvena chuan, sorkar laipuiin Mizoram leh Myanmar ramri hung a tum a, km. 16 huam chinah zalen taka inkalpawh theihna chu tihtawp a tum tih a sawi a, "Kan sorkar thar hi ka ngen duh chu, MNF sorkar nghet taka kan ding ang khan ramriah hian nghet takin ding ve rawh se. Kan hnam kan chhan vanga hmasawnna a ṭhuanawp dawn a nih pawhin hnam chhan nan ding zel turin ka chah a ni," a ti.

K Vanlalvena chuan, "Ṭiau hi Mizoram ramriah kan pawm ve ngai dawn lo a, hung pawh kan remti lo. An hung duh a nih chuan Ṭiau kam ni loin, Chindwin lui kamah han hung rawh se; khimi thlenga an hung dawn lo a nih chuan India sorkar hian rawn hung suh se. Burma leh Mizoram inkar ramri hung hi Mizo mipuite'n kan remti lo," a ti a; tuna ram leh hnam thlavang an hauh ngam loh chuan nakinah a pawi dawn thu a sawi.

Mizoram inthlanpuia an chak loh chhan chu Pathian remruat a nih thu sawiin Vanlalvena chuan, "Pathian thu loin tu mah roreltu an awm ngai lo a, vawiina roreltute hi kan pawm a ngai a, keini pawm loh vangin Pathian thu hi a danglam dawn lo," a ti a; ZPM sorkar a lawmpui thu sawiin, "Pathianin rorelna chance a pe ve a, ṭha taka ro an rêl theih nan kan ṭawngṭaisak ṭhin tur a ni," a ti.

Rajya Sabha MP chuan, inthlana chak loh vangin mawhpuh tur zawn a ni ṭhin tih sawiin, "Keimah vang a ni, ti ṭheuh turin rilru kan put thiam a ngai. Ruling lai emaw, opposition lai emaw pawh ni se, hnam martarte kan thinlunga an lan khât apiangin thil kan tisual zel ang a, kan dah len chuan kan tifuh zel ang," a ti a; MNF party-in hnam tana martarte an dah pawimawh zel a ngaih thu a sawi.