Ram dang puihna zawnpui turin ngen

Power & Electricity minister F Rodingliana chuan tun hnai khan British deputy high commissioner (Eastern India) Andrew Fleming chu Kolkata-a a chennaah a kâwm a; kawlphethaah Mizoram a intodelh theih nan ram dang leh ram dang mite puihna zawnpui turin a ngen.

F Rodingliana chuan, Mizoramin kawlphetha megawatt 4,000 siam chhuak thei turin theihna a nei laiin, tuna a siam chhuah zat chu a beitham hle tih a sawi. Mizoram sorkarin kawlphethaa intodelh mai bakah, hralh khawp a siam chhuah theih nan ṭan lak a tum thu sawiin, hmalaknaah theihtawp chhuahpui a, foreign funding leh foreign investor-te zawnpui turin a ngen a ni.

Andrew Fleming chuan, Mizoram chanchin a hriat nual tawh thu sawiin, power sector-a investment ti tur foreign company-te a lo zawnpui ngei tur thu leh, UK Export Finance pawh a lo dawr tur thu Minister a hrilh a, Mizoram tan project awm thei àwmte a lo enfiah tur thu a sawi.

British Army-ah Mizo ṭhalai tam zawk an luh theih dan tur a en chian tur thu sawiin Andrew Fleming chuan, "Commonwealth ramte tan ngaihhnathiamna thar British sorkarin a siam a, chu'ngte chu chhawr ṭangkai dan dap tlân a ni ang," a ti.

F Rodingliana hi Power & Electricity secretary Lalhmingliani Hmar leh chief engineer (civil) C Lalropianga ten an ṭawiawm a ni.