Tlâk kan duh lo a, tlâk huama thawh kan tum - ZPM Vice President

ZPM vice president Dr Kenneth Chawngliana chuan nimina ZPM pisaa inkhawmah thu sawiin, ZPM chu an policy hlamchhiah an tum loh thu leh, tlâk an duh loh rualin, tlâk huama thawh an tum thu a sawi.

Dr Kenneth Chawngliana chuan, policy nei ṭhate ram mipuiin sorkarna an siamtir ṭhin tih sawiin, "An intiam anga awm leh si lote erawh mipuite'n an paih leh ṭhin. Kan policy-ah kan chiang a, hlamchhiah kan tum lo," a ti.

Planning Board vice chairman Kenneth Chawngliana chuan, "Tlâk kan duh lo a, tlâk huam erawh chuan thawh kan tum," a ti a; inthlanpui hnuhnunga an chêt ṭhat lohna hmunahte ZPM nih an inchuh nia a sawi rualin, ZPM policy-a tui lo, nihna duh vang ringawta lutte chu ZPM tichhetu an nih theih thu a sawi.

ZPM Vice President chuan, Congress sorkar laia NLUP chu Synod-in a zirchiannaah 10-20% vel chauh a hlawhtling nia sawiin, tunah chuan party lian ber ni ṭhin kha MLA seat khat chauh neiin an awm tawh tih a sawi a, MNF sorkar policy Mizoram Intodelh Project leh Socio Economic Development Programme (SEDP)-te pawh a hlawhchham thu a sawi.

Tunah ZPM-in sorkarna an chang tih sawiin Kenneth Chawngliana chuan, "Policy en mil chungin fimkhur taka kan kal a ngai. Kan tum leh zawrh angte ṭha taka kan hlen zel a nih chuan ram mipuite'n min hnâwl ngai lo ang," a ti.