MP Vena'n Graduation a hmanpui

Laithangpuii College of Pharmacy chuan nimin khan MFM Villa, Durtlangah Graduation vawi 8-na an hmang a, Rajya Sabha MP K Vanlalvena'n a hmanpui.

K Vanlalvena chuan, ṭhalaite eizawnna siam kawnga MFM hmalaknate ropui a tih thu a sawi a, "Damdawi hmansualna vangin kan ramin nasa takin a tuar mek a, vawiina zir chhuakte hian ram leh hnam tan pharmacist ni a, eizawnna bul in ṭan hunah taima takin thawk ang che u," a ti.

Inkhawmah hian zirlai pass chhuak 42 hnenah certificate hlan a ni a; khualzahawm K Lalngilneia, FDA assistant director leh Laithangpuii College of Pharmacy principal Lalchhuanmawii ten thu an sawi bawk.

Laithangpuii College of Pharmacy hi kum 2014-ah Mission Foundation Movement (MFM) hnuaiah din a ni a, State Council for Technical Education leh Pharmacy Council of India hnuaia inziak lut a ni. Diploma in Pharmacy (D.Pharm) zir theih a ni a, batch khatah zirlai 20 zel awmin, zirlai 117 an awm mek a; zirlai 296-in D.Pharm an zir chhuak tawh a ni.