KHAWTHLIR

HBKCP an lawm

Hachhek Bial Kuhva Chingtu Pawl chuan thuchhuah siamin, Mizoram sorkarin dan loa kuhva tawlh titawp tura hma a lakna chu an thlawp tih an tarlang. "Mizoram sorkarin sorkar hmasate tih ngam loh kuhva smuggling titawp tura hma a la mek chu ṭha kan tiin lawmawm kan ti tak zet a, Mizoram sorkar hmalakna hi a tàwp thlengin kan thláwp tlat a ni," an ti.

Tanpuina pe

Lunglei District VC Association chuan Manipur buaina vanga harsatna tawk mek Zo hnahthlakte ṭanpui nan pawl pathum hnenah Rs 2,00,000 an pe. Lunglei district-a VC 70 chuangin thawhlawm an thawh hmangin Moreh aṭanga raltlante tuamhlâwmtu YMA, Manipur Group hnenah Rs 1,00,000, frontline-a duty-te hman atan Indigenous Tribal Leaders Forum hnenah Rs 50,000 leh Zomi Students Federation (ZSF) hnenah Rs 50,000 an pe a ni.

CM-in lawmpui

Tun hnaia National Red Ribbon Quiz Competition-a champion, Zonunsangi leh Jenet Malsawmpuii, Presbyterian English School, Republic Vengte chu nimin khan chief minister Lalduhoma'n a pisaah thingpui a inpui a, lawmthu a hrilh. Chief Minister chuan, zirlaite chu naupang taima leh entawn tlak, Mizoram hming timawitu an nih thu hrilhin, ram tana mi ṭangkai tak an nih ngei theih nan duhsakna a hlan a ni.

In saksak

Thingsai khawtlang chuan nimin khan an khuaa Lalchuangkima in tur hnatlangin an sa a, mi 100 chuang an thawk chhuak. Lalchuangkima in hmasa chu November 3, 2023 zing khawvar hma khan a kâng a, bungrua chuh hman a ni lo. Hei vang hian Thingsai khawtlang chuan a dung ft. 24 leh a vâng 18-in in an saksak a ni.

EMRS tlawh

Saitual bawrhsap Dr Lalngura Tlau chuan nimin khan Ngopaa Eklavya Model Residential School dinhmun tlangpui leh hmunhmate a enfiah a, thawktu tur lak belhna interview board a telpui. Bawrhsap chuan tuihâwk luankawr ṭha leh tui kawng siam thuai a ṭul thu a sawi.

MZP memorandum

MZP hruaitute chuan nimin khan Governor pisaah prime minister Narendra Modi hnena thawn tur memorandum an thehlut. Memorandum-ah hian Myanmar leh India ramria zalen taka inkalpawhna, Free Movement Regime hlih tum leh, Myanmar leh India ramri hung tum an duh loh thu an ziak a ni. Governor zin lai a nih avangin secretary V Lalsangliana hnenah an thehlut a ni.

Demonstation van

Mipuiin inthlan vote thlakna hmanrua, electronic voting machine (EVM) hman dan a taka an hmuha an tih chhin theihna tura ruahman EVM demonstation van chu nimin zing khan Kolasib district election officer John LT Sanga'n a vailiam. Van hian Kolasib district-a khua/veng hrang hrang a fang kual dawn a, mipuite EVM hmanga vote thlak dan a taka zirtir a ni ang. February 23, 2024-ah polling station 89 tlawh chhuak hman tura ruahman a ni.

Lungchhuan PES a kâng ral

January 21, Pathianni zan inkhawm hlàn khan Serchhip district-a Lungchhuan Presbyterian English School, Assam type chu a kâng a, bungraw chuh hman lohin a kâng ral. Sikul a kâng tih hriat a nih veleh ṭhelh tumin theihtawp chhuah a ni a, mahse, a kan nasat hman tawh avangin ṭhelh mih theih a ni lo. Sikul kan chhan hriat a ni lo. Lungchhuan PES-ah hian KG aṭanga pawl 8 thleng zir theih niin, zirlai 74 leh zirtirtu pakua an awm a ni.