India leh Bangladesh ramri hungtu Contractor paruk an báng tawh

India leh Bangladesh ram inrìna hung mekah, hna zawh hmaa tàwpsan contractor paruk an awm tawha thu dawn a ni.

Tlabung Post editor Vanlalhriatpuia Khiangte hnen aṭanga thu dawn danin, ramri hung hna thawh tur chin zawhfel hmaa an hna chawlhsan contractor paruk zinga pa-hnih chu hna ṭhat loh vanga tihluihnaa chawlh-tir an ni a; a dang pali chu anmahni duhthlannaa inhnûkdâwk an ni.

Sorkar laipui aiawha ramri hung hna kalpui mek viltu pahnih - EPIL leh NPCC hotute chuan, chhan eng emaw vanga contractor-te'n an hna an tàwpsanin harsatna an tawh phah ṭhin tih an sawi a, "Contractor-te hna kalsan chu mi dang kutah hlan nghal ṭhin mah se, hna a muan phah fo. Duh anga ramri kan hung sâwt theih loh chhan pakhat a ni," an ti.

Indo-Bangla Border Fencing Project hi kum 2005 khan ṭan a ni a, a tirah kum thum chhunga zawh tura ruahman phawt a ni. Engineering Projects India Limited (EPIL) leh National Projects Construction Cor-poration Limited (NPCC) ten an enkawl a ni.

Ramri hung mek hi chhan hrang hrang vangin a zawh hun tur ṭum eng emaw zat pawhsei a ni tawh a, Ministry of Home Affairs-in hriattirna thar ber a tihchhuah ang chuan, kum 2019 ral hma ngeia zawh tur a ni.

NPCC hotute sawi danin, an enkawlna hnuaia hung tur chin km. 150-ah km. 37-a thui chu Border Security Force kutah hlan a ni tawh a, EPIL enkawl chin km. 83 hung turah km. 65 hung zawh tawh a ni.