KHAWTHLIR

Harhna Ni

Vawiin, April 4 hi Harhna Ni a ni a, Presbyterian Kohhrante'n an hmang dawn. April 4, 1906 khan a vawi khat nan Mizoramah harhna a thlenga, kumin hi a kum 110-na a ni. Presbyterian Kohhrante chuan zaninah Harhna Ni pualin inkhawm an nei dawn a, thupui chu 'Harhna dik – Kohhran tipumkhattu' tih a ni ang.

Thisen pe

Inrinni khan Luangmual Branch YMA chuan Chapchar Kut 2016 pualin Aizawl Civil Hospital tan thisen unit 36 an pe a, a petute mipa 28 leh hmeichhia pariat an ni. Tuikual South Branch KṬP-in KTP Day pualin Synod Hospital tan unit 20 an pe a, a petute mipa 19 leh hmeichhia pakhat an ni. Mizoram Collegiate Boys & Girls Hostel pawhin Aizawl Civil hospital-ah unit 15 an pe a, a petute mipa 11 leh hmeichhia pali an ni.

MJA secretary ruat

MJA President chuan MJA executive secretary atan mi pathum - Lal Rinmawia (Vang-laini), Lalremsiama (Zawlkhawpui) leh Zohmingmawia (Aizawl Post) te ruat. Executive member atan mi pali - K Zothankhuma (Virthli), Lalthanzama (Sakeibaknei), Alfred Vanchhawng (DDK) leh Chhuanvawra (Mizo Arsi) te a ruat bawk.

SAY Rally

Salvation Army Youth, Central South Division chuan April 1, 2016 zan aṭangin Saitual corps-ah Youth Rally vawi 3-na an hmang a, nizan khan a ṭiak. Rally-ah hian thupui chu 'I pianna ramah kîr leh rawh' tih a ni a, India Eastern Territory-a programme administration secretary, Lt.Col. Lalhmingliana chu speaker a ni.

Kawlphetha awm dawn lo

Vawiin leh naktuk hian zing dar 9 aṭanga tlai dar 4:30 thleng Zuangtuia 132kV Sub-Station-ah 132kV CT leh PT siam-ṭhat hna thawh a ni dawn a; hei vang hian hna thawh chhungin Zuangtuia 132kV Sub-Stattion-in a châwm Aizawl hmar lam leh chhuah lam veng te, Mizoram chhim, khawchhak leh khawthlang lam zawngin kawlphetha an nei thei dawn lo. P&E department chuan mipui hriatthiamna a ngen a ni.

Biak-in hawng

Laipuitlang Presbyterian Kohhran biak-in sak thar chu Inrinni khan Synod moderator Rev. H Lalrinmawia'n a hawng. Biak-in hi a dung ft. 138 leh a vang ft. 44 niin, a chhungah mi 832 ṭhut theih a ni a, a sak nan Rs. 2,69,89,379 an hmang a ni.

Awareness programme

Inrinni khan Aijal Club-ah India Infoline Ltd. (IIFL) chuan investor awareness programme "Discussion with Experts on Equities & Mutual Fund: The Road Ahead" an buatsaih. He hun hmanpui hian IIFL Kolkata aṭangin an hotute an rawn kal a ni.

Pipe puak

Greater Aizawl Water Supply Scheme (GAWSS) Phase-I tui dáwt lian chu, Inrinni chawhma dar 11 vel khan Lawipu veng chhungah a puak a, thil dang tihchhiat a nei lo. PHE hotute sawi danin, pipe a puak tih an hriat veleh siam ṭhat hna an thawk nghal a, PHE minister Zodintluanga'n a enpui bawk a; Inrinni zan tìr lam khan an siam-ṭha leh a ni.