MNF ṭhalaite'n dâwt sawiah Zira puh

MNF ṭhalaite chuan thuchhuah siamin, Assembly budget session neih zawh tâka dâwt sawiah Home minister R Lalzirliana an puh.

MNYF chuan, Home Minister hian police thite chungchangah Home department-in order a chhuah loh thu a sawi nia tarlangin, "IGP hmingin September 2, 2015 khan order chhuah a ni. Order-ah hian kum 2015 chhungin September thla thleng khan police zinga zu leh a kaihhnawih avangin mi 100 dáwn an thih thu tarlan a ni a, zu leh meizial zûkte bànsan theih a nih chuan police zingah thihna thleng ṭhin a tlem theih thu pawh tarlan a ni," an ti.

Order-ah chuan, medical staff-te kaihhruaina hnuaiah 3rd. Bn. MAP Commandant-in health care and physical training a kalpui mek chu entawn ṭheuh tura MAP leh IR commandant zawng zawngte hnena hriattirna an pek thu pawh a chuang niin MNYF chuan an tarlang a, "Mizoram sorkarin zu a zawrh hma chuan zu zuarte leh zu rûite chuan police uniform hate leh police hmunpuite chu hla takah an hêl ṭhin," an ti. Tunah erawh chuan zu zuar leh zu in duhte'n police hmunpui an pan khawm tawh thung tih an tarlang bawk.