Zofa hmun hrang hranga awmte unau Kan ni reng dawn: Myanmar Vice President

5th April, 2016

Myanmar second vice president Henry Van Thio chuan, khawvel a awm chhung chuan hmun hrang hranga Zofate chu unau an ni reng dawn tih a sawi.

MZP-in April 3, 2016-a Baptist Church House compound, Naypidaw, Myanmar-a Myanmar member of parliament (MP)-a Mizo tling tharte chawimawina hun an buatsaihah thu sawiin Henry Van Thio chuan, "MZP-in neih sum leh pai, tha leh zung senga hetianga MP kan nih min hlutsaka min chawimawi hi thinlung takin ka lawm hle a ni," a ti.

Myanmar Vice President chuan, Zofa khawvel hmun hrang hranga awmte tan tun maia thil tihsak theih an neih loh thu sawiin, "Pathianin hun ṭha min siamsak ang a, Zofate tan lungrual takin hma kan laho zel dawn a ni," a ti a; Pathianin bul a ṭansak tawh angin a tawp pawh ṭha takin a zawhsak an rin tlat thu a sawi.

Khawvel awm chhung chuan khawvel hmun hrang hranga awm Zofate unau an nih reng dawn tih sawiin Henry Van Thio chuan, "Tuna MZP hmalakna hi bul ṭanna
ṭha ni turin ka beisei. Zofa hmun hrang hranga awmte hi kan inpumkhat theih nan hian kei leh kan MP-te hian mawhpurhna nasa tak kan nei a, kan inpumkhat theih nan nasa takin hmalak kan tum a ni,” a ti.

MZP vice president B Vanlaltana pawhin thu sawiin, "MZP hi a din tirh aṭangin zirna leh ram leh hnam siamṭhat chauh ni loin, Zofate khawvel hmun hrang hranga awmte inunauna leh inpumkhatna ṭha kan neih theih nana hmalak hi a ni," a ti.

Zofate chu khawvel hmun hrang hrangah ṭhen darh an ni tih sawiin B Vanlaltana chuan, "Zofate hian hnam khat kan nih ang hian hnam hming pakhat hi kan nei ve lo. Myanmar rama awmte chuan Chin kan inti a, a ṭhenin Kuki kan inti a, keini Lusei tawng hmang ho hi chuan Mizo kan inti a ni," a ti a; Zofate chu rorelna pakhat hnuaiah an la awm a rin tlat thu a sawi.

MZP Vice President chuan, Myanmar MP atana Mizo tling zawng zawngte an lawmpui thu sawiin, an kal zelna turah duhsakna a hlan.

Chawimawina inkhawm hi MZP general secretary L Ramdinliana'n a kaihruai a, Myanmar MP atana tling Zofate chu thangchhuah diar leh chawimawina thuziak an hlan a ni.