Kum 8 chhungin tlangram lo neih 50.81%-in a tlahniam - Agriculture deptt.

Agriculture depart-ment chhinchhiah danin, kum 2008-2015 chhung khan Mizoramah leilet hmanga buh chînna 50.61%-in a pun belh a, tlangram lo neih zau zawng 50.81%-in a tlak-hniam phah thung.

Kum 2011-12 khan leilet aṭangin buh metric ton 26,251 thar a ni a; kum 2012-13 ah MT 30,572, kum 2013-14 ah MT 33,323, kum 2014-15 ah MT 37,096 thar a ni. Kum liam ta, 2015-16 ah buh MT 36,471 thar a ni a, hei hi kharif rice chauh niin, rabi a tel lo.

Leileta buh chìnna kum tin a pung zel a; tun dinhmuna Mizorama leilet, buh chin theihna zau zawng chu hectare 74,644 a ni.

Hetih lai hian, tlang-ram lo neih chu a kum têlin a tlahniam a, thar chhuah pawh a tlahniam ve zel niin Agriculture department chuan an chhinchhiah a; lum 2011-12 ah buh MT 26,644, kum 2012-13 ah MT 27,128, kum 2013-14 ah MT 25,671, kum 2014-15 ah MT 23,583 leh kum 2015-16 ah MT 24,343 thar chhuah a ni.

Kum khata Mizoramin buhfai a mamawh zat nia chhût chu MT 1,80,000 a ni a; chutih laiin, kum 2015-16 chhunga Mizorama leilet leh tlangram lo aṭang buh thar zawng zawng chu MT 60,814 a ni.