Tuichawngchhuah la veng

Kumin February 26-a mi ṭhenkhatin zirna in an hâlna hmun Tuichawngchhuah chu, thla khat chuang sipai venhimna hnuaiah a awm tawh.

Tuichawng-chhuah hi dân loa Chakma-te dinah MSU leh pawl hrang hrangten an ngai a; zirna in hâl a nih veleh buaina punlun palh thei tur vengin sipaiten an awm chilh nghal. Lungleia Additional DC thuchhuak angin, Lungleia II Bn MAP section khatten tun thlengin an la veng.

Gauhati High Court-in, Tuichawngchhuah chhuahsan tura LAD department-in a khaw mite a hriattirna (eviction order) a hrên khawtlai avangin, Tuichawngchhuahah hian chhungkaw 49 an la khawsa reng a, tun hnaiah khaw rauhsan tura hriattir an hmu leh rih tawh lo tih, a khaw mite chuan thudawnna an hrilh.

He tih lai hian, Tuichawng-chhuah Upgraded Primary School hâl chungchangah police-te chuan tun thlengin a mawhphurtu an la man lo a ni.