Sawm vangin palai hna ka thawk: Zoramthanga

MNF president Zoramthanga chuan, India sorkar leh hel pawlte inkara remna palai hna leh India ram páwn thlenga remna palai hna a thawhte chu sawm a nih vanga thawk a nih thu a sawi.

Nimina Mizo Hnam Runa inkhawmah thu sawiin Zoram-thanga chuan, Naga (NSCM-IM) leh sorkar inbiaknain rei tak awmzia a neih theih loh hnuah kum 1999 khan PM Vajpayee ngenna angin a inrawlh tih a sawi a, "Central sorkar a inthlak hnuah PM Manmohan Singh khan ka hna chhunzawm leh turin min sawm a, min ngen anga chhunzawm ka ni. NSCN-IM hotute pawhin urhsûn takin palai hna thawk tur min ngen bawk," a ti.

MNF President chuan, Mani^-pur hel intélkhawm, United People's Front pawhin kum 2007 leh 2008 khan India nena inbiakna kawng zawng turin an sáwm tih sawiin, "Inbiakna ṭanin suspension of operation an nei ta a. Central-a sorkarin inkahhai ringawtin a kalpui a, NDA an sorkar khan political level-a inbiakna neih a nih theih nana hma la turin UPF chairman Thangboia'n February 5, 2015 khan lehkha thawnin min rawn ngen leh a ni," a ti a; chu chu India sorkarah thlenin, political level-a inbiakna chu an chhunzawm niin a sawi.

Zoramthanga chuan, Myan-mar rama hel pawl intêlkhawm, UNFC-te pawhin February 28, 2009-ah Myanmar sorkar nena an inbiaknaa pui turin an sáwm a, mahse, sorkar laipuiin an remti lo ang tih chhuanlama hmangin a hnar tih a sawi a; NDA an sorkar hnuah an sàwm nawn leh angin hma a la ta niin a sawi bawk.

MNF thuchhuah chuan, nimina Mizo Hnam Runa in-khawmah hian an party zawm tharte an lawm lut niin a tarlang.