Mizoram Assembly budget session thlirletna

Mizoram Legislative Assembly pasarihna ṭhut-khawm vawi riatna, budget session chu March 31, 2016-ah zawh a ni a; he session chungchanga mithiamte leh chanchinbumite'n an ngaihdan an sawiah, minister ṭhenkhatin an hna an tlin viau laiin, minister ṭhenkhat chuan an hna an hre chiang tâwk loah an ngai.

Hetih lai hian, eptu MLA-te erawh chuan an tih tur an ti
ṭha thawkhatah an ngai hlawm a; official-te'n demand sawiho hun an ngai pawimawh tâwk loa an hriat thu te, department
ṭhenkhatin zawhna chhàn loh an nei an ngaimawh thu te, awmze nei loa inhnialna a awm loa an hriat thute an sawi bawk.

HC Vanlalruata, Journalist

Press Truct of India (PTI) cor­res­­pondent HC Vanlalruata chuan, eptu MLA ṭhenkhatin beisei an pha lo nia a sawi laiin, ṭhenkhat a fak thung a, "Pu Lalruatkima a che ṭha thawkhat hle a, Dr K Beichhua leh Lalrinawma te an nêp lo viau," a ti. Minister zingah a naupang lam, Zodintluanga, PC Lalthanliana, Lalrinmawia Ralte leh C Ngunlianchunga ten an hna chanpual an hre chianga a hriat thu sawiin, "An taima a, home work an ti ṭha tih hai rual a ni lo. Minister zingah an department chan chanchin leh thil kal vel hre chiang lo leh zir ṭha peih lo an awm a, an zahpuiawm lek lek a ni," a ti.

HC Vanlalruata chuan, eptu party, a bikin MNF MLA-te'n theihtawp chhuah tum mah se, harsatna an tawh fo chu an sorkar laia mi
ṭhenkhatin an lo dai buak tawh dan rorel lai MLA-te'n an sawi chhuahin an khâ a chih leh mai ṭhin thu leh, an khawngaihthlak a tih thu a sawi.

India rama state Assembly-te inkhawm hun chhung a rei lo tlangpui tih sawiin, HC Vanlalruata chuan, "Duhthusamah chuan kum khatah ni 60 tal ni se ti pawl an awm chungin Mizoramah chuan kan pha lo nasa hle. A chhan bul ber chu sorkar lamin thawh tur (business) chhawpchhuah tur an nei lo lutuk hi a ni. Dan siam pawl ni siin dan an siam tam lo khawp mai a, Assembly inthlanpui hnaihah phei chuan political platform-ah an hmang tam hle," a ti. Rorel lai MLA zingah eptu ang maia la khawsa an awm tih sawiin, HC Vanlalruata chuan, "An hotute tihlâwm an tum luatah an ṭawngkam hman vel a ninawm," a ti bawk.

R Lalrinawma, Dy.Speaker

Assembly deputy speaker R Lalrinawma chuan, sorkar department aṭanga bill lut tlai vangin member-te'n a copy an dawng tlai ṭhin chu pawi a tih thu sawiin, "Session laite'n an dawng a, hun rei deuh nei thei ila ṭha tur a nia. Kan MLA -te hi bial bik ngaihtuahah chuan an ṭha hlawm khawp a, mahse, legislation-ah tak hian duh aiin an tel ṭha tâwk lo a, hei hi bill dawn tlai vangte pawh a ni," a ti.

Sorkar official-te chungchang sawiin R Lalrinawma chuan, "Official-te hian question hour an ngai pawimawh khawp mai a, mahse, minister-te demand sawi­honaah an awm ṭha tâwk lo a, ram hruaitute'n an ngaih pawimawh zawng an sawi chhuahte an ngaihthlak ṭhat a ngai," a ti a; House chhung boruak chu a ṭha hle tih sawiin, vai ram ngaihtuahin Mizoram Assembly session chu entawn tlak hlea a hriat thu a sawi.

Deputy Speaker chuan, session hun chhung duh aia a rei loh thu sawiin, "All India Presiding Officer Conference, Gujarat-a neihah chuan, kum khatah state lianin ni 60 chhung session nei se, state têin ni 30 tal nei se tih a ni," a ti. MLA-te chu mipui aiawha roreltu an nih thu sawiin, "Assembly session hi a hma thla khatah hriattir lâwk vek an ni a, MLA-te hi zan riaka khualliana kal bo loh a
ṭha a, session lai hi chuan programme dang neih loh a ṭha a ni," a ti.

Laldingliana Sailo, Journalist

Senior journalist leh ZONET Cable TV-a news editor Laldingliana Sailo chuan, department ṭhenkhatin zawhna an chháng lo chu action lakna chi nia a ngaih thu sawiin, "Speaker-in a tawpa a puanah, GAD-in zawhna pali an chháng lo a, Health department-in zawhna pakhat an chhang lo. Chief Minister chan ber GAD-in engti zia nge an chhan loh ngam? Hetiang mai mai hian mipui tana rorelna Assembly an palzût tur a ni lo, action-te hi lak tur niin ka hria," a ti.

Laldingliana Sailo chuan Finance minister Lalsawt leh eptu MLA-te fakin, "Pu Sawta'n a tih tur a ti ṭha a, eptu ho pawhin an tih tur an ti ṭha viau," a ti a; chutih rualin, eptu MLA zingah ṭawngkam nalh chiah lo hman ching an awm awm thu leh fimkhur deuh se a duh thu sawiin, "Pu Zawma te angin ṭawngkam zahawm deuh hlek hmang thei se, mipuiin an ei leh zual ang tih ka ring," a ti bawk.

Dr Kenneth Chawngliana, Politician

Politician hlun leh minister-te pawh lo ni tawh Dr Kenneth Chawngliana chuan, thil dik lo Assembly House-a sawi chhuah te, chanchinbumite hai chhuahte leh RTI Act hmanga hai chhuahte chu sorkarin a ngaihsak tak tak lo nia sawiin, chuvang chuan mipuiin Assembly session an ngaihsak loh phah nia a hriat thu a sawi.

MPC party hruaitu Kenneth Chawngliana chuan, CM Lal Than­hawla'n House-ah opposition MLA-te fak tawh mah se, a khaikhawmna angah a sawi mai nia a ngaih thu sawiin, "Mipui aṭanga sorkar tih dik loh sawiselnate an ngaihsak tawk lo a, lei dawh chim pawh an sawi ral leh mai mai a, inthlan hi kan nghak mai niin ka hria," a ti. Eptu MLA-te chu mi thar an nih hlawm avangin an la tlángnêl tawk loa a hriat thu sawiin, "Sorkara tih theih an neih hi an hmang ṭangkai tawk lo a, party politics lamah hian an inkalpui lutuk em ni chu aw a tih theih a, ram inawpna lamah an inkalpui lutuk lo niin ka hria," a ti.

Dr Kenneth Chawngliana chuan, an party-a an sawihonaah chuan, minister zingah Zodin­tluanga, PC Lalthanliana leh C Ngunlianchunga ten an hna an tlin a, an hre chiang nia an ngaih thu sawiin, "Minister ṭhenkhat chuan department lian chang siin, an hna an hneh tâwk lo hle. Hmasawnna sawi pawhin an department chanin hma a sawn lo ber vek a, hotu lian an nih angin huai tak takin thil an sawi maiah ka ngai a, mipui hi an tui lo niin ka hria," a ti bawk.

Lallianchhunga, MZU

Mizoram University-a Political Science department-a assistant professor Lallianchhunga chuan, tun hma zawng aiin Legislative Assembly hnuaia Committee péng hrang hrangte’n ziaka report an pekin páwn lamah ngaihven a hlawh zuala a hriat thu a sawi a; chutih laiin, House chhunga member-te’n thil eng emaw an chai laih tham hmuh tur a awm loa a hriat thu a sawi.

Assembly committee pêngte chu ruling MLA kaihhruaina hnuaia mite an ni tih sawiin, Lallianchhunga chuan, "Anni hian an thil hmuh ang ang, ram leh hnam tana ṭha tur nia an hriat ang huai taka report an thehlut ngam khan session a tingaihnawm zual. Sorkar hmalakna famkim tâwk lo an tarlante kha sorkar tan ngaihthah ngawt a rem tawh lo," a ti.

Lallianchhunga chuan, ruling MLA-te’n zawhna leh chhanna hmangin sorkar hmalak tawhna leh hmalak mekna an khawrh chhuak zo lo deuha hriat thu leh mahni bial chhung harsatna neuh neuh leh a kar laklawha minister-te thlavâng hauh tura thusawi tum ringawt an awma a hriat thu a sawi. Eptu MLA-te fakin, "An che chhe lo. Tun ṭum budget session chhunga an chêt dan kha a ṭhain a mawi a, awmze nei loa inhnialna a awm lo," a ti bawk.