Myanmar thlawhtheihna chesualah mi pariat an hliam, thi an awm lo; Vawiinah thlawhtheihna a ṭum thei dawn

Nimin chawhma dar 10:25 vel khan Mizorama rawn tlanchhia Myanmar sipaite phur haw tur Myanmar thlawhtheihna chu Lengpui Airport-ah a chesual a, a chhunga chuang mi 14 zinga pariat an hliam a, thi an awm lo. Thlawhtheihna chetsual avang hian nimina Lengpui Airport-a thlawhtheihna ṭum turte an ṭum thei lo a, vawiinah erawh chuan an ṭum thei tawh dawn.

Vanglaini thu dawn danin, thlawhtheihna, Myanmar Air Force Y-8 Cargo hi runway-a a ṭum hnuah airport terminal zâwn a thlen hma deuhin ding lama runway thlangah a tlân liam a ni. Thlawhnaah mi 14 an chuang a, mi pariat an hliam a, Airport-a duty-te'n buaipui nghalin, Lengpui CHC (damdawi-in)-ah hruai nghal an ni. Hliam zingah na lutuk an awm lo.

Hliamte chu Lengpui CHC-ah a ṭul anga buaipui a nih hnuah hliam tuar lote nen Assam Rifles-te'n enkawl zui turin an la a; Myanmar sipai tlânchhia an rama phurh haw turte pawh hmun himah dah an ni.

Tarlan tawh angin, Myanmar sipai 277 chu Arakan Army (AA) nen an inbeihnaah AA-te'n an awmna hmun (camp) an chhuh avangin an tlânchhia a, January 17, 2023 khan ramri hnaih khua, Bandukbanga, Lawngtlai district-ah an ralthuam eng emaw zat nen an rawn tlânchhe lut a, Assam Rifles-in an lo buaipui.

Bandukbanga aṭang hian Lungleia Assam Rifles hmunah hruai an nih hnuah thlawhtheihna hmanga Myanmar panpui turin Lengpui panpui leh an ni. January 22, Thawhṭanni khan mi 184-te chu Lengpui Airport aṭangin Myanmar thlawhtheihna hmanga hruai haw an ni tawh a, hruai chhuah hmabak mi 93-te hruai chhuak leh tur Myanmar thlawhna chu nimin khan a chesual ta a ni.

Tun dinhmunah chuan Myanmar sipai Mizorama la awmte leh anmahni hruai chhuak tura rawn kal, chesual tate an ram lama hruai haw hun tur leh hruai haw dan tur hriat theih a la ni rih lo.

Nimin khan Lengpui Airport-ah hian khualzin phur thlawhtheihna ṭum ruk vel rawn ṭum tur a ni a, mahse, Myanmar thlawhna a chetsual avangin thlawhna ṭum tur leh thlâwk chhuak tur zawng zawng ṭhulhtir vek a ni. Vawiinah chuan thlawhtheihnate a pang­ngaiin a thlâwk leh thei tawh tura beisei a ni.