Mizoram sorkarin OMB hmangin loan cheng vbc. 80 a pûk dawn

Mizoram sorkar chuan open market borrowing (OMB) hmangin loan cheng vbc. 80 a pûk leh dawn. Hriat theih chinah sorkar kum kal mek 2023-24 chhungin Mizoram sorkarin cheng vbc. 650 a pûkna tur a ni a, ZPM-in sorkarna an chan hnuah ṭum khat an pûkna tur a ni.

Vanglaini thu dawn danin, Mizoram sorkarin OMB hmanga sum a pûkna tura tih tur ṭulte chu Reserve Bank of India (RBI)-in a buaipui a; RBI chuan OMB hmanga Mizoram sorkarin sum pûk tur zawn a nih thu January 19, 2024 khan a tichhuak tawh.

OMB hmanga sum pûk a nih theih nan RBI-in state sorkar tana sum pûktir thei tur a zawng a, financial institution-te'n an chháng ṭhin. Mizoram sorkar sum pûk tur chháng duh tan RBI chuan nimin kha thleng hun a hawng.

OMB hmanga sum pûk chu kum khatah a pung nen vawi hnih rulh tur a ni a, kum 10-15 velah sum pûk zawng zawng rulh a ngai a, a punna (interest rate) chu 7-8% vel a ni.

Mizoram sorkarin kumin sorkar kum kal mekah a ṭum khat nan May 2023 thla laihâwl khan OMB hmangin cheng vbc. 250 a pûk a, June thlaah cheng vbc. 100, July thla laihâwlah cheng vbc. 80, September thlaah cheng vbc. 80 leh October thlaah cheng vbc. 60 a pûk a; cheng vbc. 80 a pûk leh a nih chuan cheng vbc. 650 a pûkna tur a ni.