Minister-te'n leiminna hmun an enfiah

Disaster Management & Rehabilitation (DMR) minister K Sapdanga leh PWD minister Vanlalhlana te chuan nimin zing khan Vaivakawn Zohnuai pénga leiminna hmun an tlawh. Lei tlabal siamṭhatna turin cheng nuai 218 ruahman a ni.

Ruahman dan chuan, Vaivakawn Zohnuai péng lei tlabal hi RCC balcony hmanga siam tum a ni a, cheng nuai 218 hû DPR siam a nih bakah, SASCI sum nuai 60 chu dah a lo ni tawh. Hmalakna hmasa atan tuna lei thâw inchhêk mek cubic metre 4,900 vel chu thenfai thuai tum a ni. Zohnuai péng leh Ropaiabâwk inkar kawng chu mamawhna a nasat avangin hman lailawk turin LMV chin kal theihin siamṭhat a ni a, January 19, 2024 khan hawn a ni.

DMR minister K Sapdanga chuan, mamawh hmasa ber chu - tuna chhiatna thlengin chhiatna nasa zawk a thlen lohna tura ven a nih thu a sawi a, "Department hrang hrangin muang­cháng loa kan tih tur ṭheuh tih thuai thuai a ṭul a, hna a rang thei ang bera ṭan a nih theihna tura rua­hmanna a chak thei ang bera neih a ṭul," a ti.

K Sapdanga chuan, Local Council chu leivûng paihna leh bawhzui ngai apiang lo bawhzui tura chahin, "Sum harsatna nasa viau mah se, a theih ang ang pawt khawmin hmalak mai a ṭul a ni," a ti a; leiminna hmun chu mimal in han sak lehna atan a remchang tawh lo pawh a nih pawhin, vantlang hmun nuam taka chei theih a ni dante la en zui zel a duh thu a sawi bawk.

PWD minister Vanlalhlana chuan, PWD anga an tih theih chin chu ṭha taka tih an tum thu sawiin, "Department officer-te ṭhahnemngai taka thawk turin ka chah nawn leh duh. Deparment hrang hrang kan thawhho a ṭul a, harsatna awm loa ṭha taka hna thawh a nih theih hi ka duh ber a ni," a ti.

PWD hotute'n hnathawh tawh dan leh chhunzawm zel an tum dante sawiin, leiminna hmun chu ruah a sûr chuan tla leh mai theia ngaih a nih avangin a rang thei ang bera hna thawh a ṭul thu an sawi a; hna thawh a nih hunah a thlanga NH-54 kawngpui pawh khâr zeuh zeuh a ṭul dawn thu an sawi bawk.

Minister-te hi Revenue secretary R Zarzosanga, DMR secretary K Lalrinzuali, UDPA secretary Lalmalsawma Pachuau, Aizawl DC Nazuk Kumar, PWD engineer-in-chief Lalrinkima Hnamte leh chief engineer H Zoramliana leh soprfkar offici8al dangte'n an ṭawiawm a; Vaivakawn LC-in an lo dawngsawng. Minister K Sapdanga hian a bial chhunga Hunthar Middle School bul lei chê a hmunah a enfiah nghal a ni.