SYS Minister leh SAI DG an inkâwm

Sports & Youth Services minister Lalnghinglova Hmar chuan nimin khan New Delhi-ah Sports Authority of India (SAI) director general Sandip Pradhan a kâwm a, Mizorama SAI dinhmun leh hmasawnna turte an sawi dun.

SYS Minister chuan, infiamna lama Mizoramin hma a sawnna tak tak tur chu SAI nena thawh dunnaah thui tak a innghah thu a sawi a; Mizoram sorkar tharin infiamna lam kalpui a tum danah infiammite tihmasawn tur leh sport association-te tichak tura ruahmanna a neihte a hrilhfiah.

SAI Director General chuan, Mizoram sorkar kal tum dan chu SAI din chhan nena thil inhmeh tak a nih thu sawiin, SAI aṭanga puihna awm theite pek ngei an tum tur thu a sawi.

Lalnghinglova Hmar chuan, Mizoram SAI chu Northeast Regional Centre, Manipur hnuaia awm a nih thu sawiin, Guwahati Regional Training Centre hnuaia sawn ni thei se a duh thu SAI hotupa a hrilh a; Sandip Pradhan chuan, an lo sawiho tur thuin a chháng.

Mizorama SAI centre tlawh tur leh infiamna lama Mizoram dinhmun hre chiang tura Mizorama zin turin Sports Minister chuan SAI DG a sáwm a; Sandip Pradhan chuan hun remchangah zin a tum thu a lo hrilh a ni.