National Voters' Day pual intihsiak

National Voters' Day vawi 14-na (January 25, 2024) pualin Aizawl DC, Aizawl District Education Officer pisa leh a kaih-hnawih department-te'n Aizawl district-a high school leh higher secondary school zirlaite tan nimin khan Mizo High School-ah essay leh lemziak intihsiak an buatsaih.

Intihsiak hi zirlai, vote nei thei ṭêp tawhte zingah mipui thlan ram rorelna ropuina leh mipui mawhphurhna an thinlung tuh a nih theihna tura buatsaih a ni a, high school paruk leh HSS paruk aṭangin zirlai 96 an tel. Intihsiakna hi Aizawl bawrhsap Nazuk Kumar chuan a chhim a ni.

Essay ziah intihsiak hi high school zirlaite tana thupui chu 'Importance of voting for stronger democracy' tih a ni a; HSS zirlaite tana thupui chu 'No voter to be left behind' tih a ni. Lemziaka intihsiak chu H/S leh HSS zirlai thliar loin, a duh apiang tan a ni a, thupui chu 'Nothing like voting, I vote for sure' tih a ni.

Mizoram district dangah pawh National Voters' Day pualin zirlaite tana intihsiakna kalpui a ni a; National Voter's Day-ah state pum huapa inkhawm buatsaih tum niin, chutah chuan lawmman sem a ni ang.